Read Zou LAPITE 107 Bible Online

LAPITE 107 - Zou bible

LAPITE 107

¹TOPA tungah lungdam ko un; azieh pen ama hoi a, ama’ itna kip tawntung hi.

²Nisuona le nitumna lam, leilu lam le leitaw lam, gam teng pana a kaikhop, hahsatna pana a tatkhiet TOPA’ tatsa mite in tu-a teng ci kiakia uheh.[226]

⁴Pawlkhatte ahile senel gamdai-ah a vahvai vua, a tenna ding uh khuopi tunna lampi a mu zo sih uhi.

⁵Gilkiel dangta-in a om vua, a sung vuah a hlagau uh a balia hi.

⁶Tua ciengin lungkhamin TOPA kungah a kiko vua, ama in a lungkhamna uh panin amate a hunkhie hi.

⁷A tenna ding khuopi a tun dongun ama in lampi manah amate a pui hi.

⁸Ama’ itna kip le mihingte tunga a lamdang ama’ nasepte ziehin, TOPA tungah amate in lungdam ko ta uheh,

⁹azieh pen ama in a dangtate taisah a, tuale ama in a gilkielte, na hoite tawh a dim hi.

¹⁰Pawlkhatte khuomu lah, mielking sungah a to vua, thongkiete in gentheina le siakol bulna a thuoh uhi,

¹¹azieh pen amate in Pasien’ thugente a ledo vua, Sangpen Pa’ lamlahnate a niel uhi.

¹²Na ham sepna tawh amate a lungkie uhi; amate a puasuh vua, a panpi ding koima om lo hi.

¹³Tua ciengin a lung uh khamin TOPA kungah a kiko vua, ama in a lungkhamna panun amate a hunkhie hi;

¹⁴ama in khuomielna le lungzinna panin amate a peipi a, a kikhina uh botsan hi.

¹⁵Ama’ itna kip le mihingte tunga a lamdang a nasepnate ziehin TOPA tungah lungdamko ta uheh.

¹⁶Bangzieh ahei cile ama in sumngo kotpite sukeh a, sia zawlte tun ni a suo hi.

¹⁷Pawlkhatte a gitlo gamtat ziehun a ci uh na a,[227] amau’ khielna ziehin gentheina a thuoh uhi;

¹⁸amate in an kici mawngmawng du loin a luoh uh suoh a, sina dawngkot tawh amate a nai ta uhi.

¹⁹Tua ciengin amate lungkhamin TOPA kungah a kiko vua, tuale a lungkhamna uh panin amate a hunkhie hi.

²⁰Ama in thu vaihlahin amate damsah a, suhsietna panin amate suohtasah hi.

²¹Ama’ itna kip le mihingte tunga a lamdang a nasepnate ziehin TOPA tungah amate in lungdamko ta uheh.

²²Amate in lungdamko biehpiehnate pie uh hinlen, lungdam lasahna tawh ama’ nasepnate gen uheh.

²³Pawlkhatte tembaw tawh tuipi tungah a pei vua, tuipi liente tungah sumbawl nasep a sem uhi;

²⁴TOPA’ nasepnate, tuili thuhpi sunga ama’ nasep lamdangte amate in a a mu uhi.

²⁵Azieh pen ama in thu pie a, huipite langin, tuipi huolte sangtahin a kato hi.

²⁶Amate vanlam sena-in a kinei vua, a thuhna lamah a kiesuh uhi. Amau’ tuosietna sungah a hanna uh a tuisuoh mang hi.

²⁷Amate zukham bangin a hawilen kawikawi vua, ci nading mel a thei sih uhi.

²⁸Tua ciengin amate lungkhamin TOPA kungah a kiko vua, ama in a lungkhamna uh panin amate a hunkhie hi;

²⁹ama in huipi daisah a, tuipi huolte a sip dide hi.

³⁰Tua ciengin tuate a khawl zo tah ziehin amate a lungdam vua, tuale ama in a lunggulna mun vuah amate a peipi hi.

³¹Ama’ itna kip le mihingte tungah a lamdang a nasepte ziehin, TOPA tungah lungdamko ta uheh.

³²Mihon kikhopna sungah amate in ama patawi-in, upate kikhopna munah ama phat ta uheh.

³³Ama in guntuite senel gam suohsahin, ciatuite leigaw suohsah a, tua gam sunga a teng mihingte’ gitlona ziehin,

³⁴an tampi pienna gam pen cilei gawta a suohsah ta hi.

³⁵Ama in senel gam buoltui suohsah a, ngal gawta ciatui a suohsah hi.

³⁶Khum munah ama in a gilkielte tengsah a, amate in a tenna ding uh khuopi a sat uhi;

³⁷amate in lo-ah khaici tu-in, lenggui a suon vua, an tampitah a la uhi.

³⁸Ama’ thupha tawh ante nahpi-in pung a, ama in a bawngte uzong a kiemsah sih hi.

³⁹Bawlsietna, buoina, le dana ziehin amate kiemsuhin, a kiniemkoi suh ciengin,

⁴⁰ama in a bawlsiete tungah a lungkim lona sungsuhin, lam op lona gamlahah kivielesah kawikawi a,

⁴¹hinanle a gentheina uh panin ama in tasamte lamto a, tuuhon bangin a innkuonpite a pungsah hi.

⁴²Thuman mite in tua khu mu-in a kipah vua, tuale gitlona zosie in a kam uh a sipsah hi.

⁴³A pilte in tamte thupi sanin, TOPA’ itna kip lungngai ta uheh.