Read Zou LAPITE 109 Bible Online

LAPITE 109 - Zou bible

LAPITE 109

¹La makaipa kunga David’ laphuo khat. Kang phat Pasien aw, dai op mawh sin.

²Bangzieh ahei cile ka langkhatah migilote le zuouthu gente a kamkah vua, amate in ka langkhatah zuou genna leii tawh thu a gen uhi.

³Amate in mudana kammalte tawh kei ei imtawm vua, thu om lopi-in ei do uhi.

⁴Ka itna ei thuhna-un amate adinga thungetna[231] ka nei laitah nangawnin, keima ei mawsah uhi.

⁵Tuaci’n amate in kei tungah hoina sietna tawh, itna mudana tawh ei thuhkia uhi.

⁶Amate in,[232] “Ama do dingin migilo khat koi un; ama’ ziet lamah a mawsah ding mi khat dingsah un.

⁷Ama thu a kisit ciengin, thu lelin kimu heh; ama’ thungetna zong mawna-in kisimpieh heh.

⁸A khan kumte tom hinlen; midang khat in ama’ za luo taheh.

⁹Ama’ tate pa nei loin om hinlen, ama’ zi zong meigong hi taheh.

¹⁰A tate khutdaw ngenin vah kawikawi heh; a kisie amau’ tenna panin kinotmang[233] ta uheh.

¹¹A leibatna pa in a neisa zosie kilah dawh taheh; khuolmite in ama’ sepsa gate tomgam pieh ta uheh.

¹²Ama tungah a migi koima khat zong om loin, pa nei lo ama’ tate khuotuo ding koima om sih heh.

¹³Ama’ suonlehlahte mangthai taheh; khang nina ciengin ama’ min kiphietmang taheh.

¹⁴TOPA mai-ah a pa’[234] khielna kiphawhkia hinlen, a nu’ mawna kiphiet mang sih taheh.

¹⁵TOPA mai-ah tuate omsah suoh unlen, leitung panin ama’[235]kiphawna om ta sih heh.

¹⁶Azieh pen ama in migitna lah ding phawh kha loin, mizawng mi cimawte le lungsim kitamzan mite a si dongin a gamdel zawsop hi.

¹⁷Ama in mi samsiet nuom a sa hi; ama tungah samsietna tung taheh. Ama in thupha a dei sih hi; ama le thupha kigamla taheh.

¹⁸Ama in samsietna puon tungsil bangin sil a, ama’ pumpi sungah tui bangin, a gu a tangte sungah sathau bangin, tuate lutin kizel taheh.

¹⁹Tua samsietna khu ama’ kituomna puontuol bang hinlen, nisima a kigahna khu kawnggah bang taheh,” a ci uhi.

²⁰Tua khu keima ei mawsahte tung, ka hinkhuo ei gensiete tungah, TOPA kung pana ang pei a thaman uh hi taheh.

²¹Ahi vangin TOPA ka Pasien aw, na min na khuolna tawh keima tangin hing pang in; na itna kip hoi ahi ziehin keima ei hunkhie in.

²²Bangzieh ahei cile kei zawngin ka cimaw a, keima sungah ka lungtang kisun pailet hi.

²³Nitah nihlim bangin ka tum ta hi; kauphe bangin ei kithingkhe hi.

²⁴Antanna ziehin ka khupte a zaw hi; ka pumpi gawngtam zo ta hi.

²⁵Keima ei mawsah mite’ nuisatin ka om ta hi; amate in kei ei mu ciengin a lu ei peisan uhi.

²⁶TOPA ka Pasien aw, keima ei hu in! Na itna kip dung zui-in keima ei hundam in.

²⁷Tami nangma’ khut tawh kibawl ahi lam amate theisah in; TOPA aw, nangma in tuate na bawl zo ta hi.

²⁸Amate in ei samsah in, hizongle nang in thupha nei pie ding hi. Ka langte maizumsah in;[236] na nasempa ei lungdamsah in.

²⁹Keima ei mawsah mite mindaina silsah inlen, puontuolpi sil bangin a maizumna sung vuah kituomcip ta uheh.

³⁰Ka kam tawh nahpitahin TOPA tungah lungdam ka ko ding hi; keima in mihonte lahah ama ka phat ding hi.

³¹Bangzieh ahei cile a sina ding dong uh a mawsah thukhenna a pie dingte kung panin, amate a hundam dingin mi cimawte’ ziet lamah ama a ding hi.