Read Zou LAPITE 112 Bible Online

LAPITE 112 - Zou bible

LAPITE 112

¹TOPA phat un! TOPA zatah a, ama’ thupiehte nuom a sa mite thupha nga ahi uhi.

²Amau’ suon le hlahte leitungah mi thahat ahi ding uhi; thuman mite’ khanggui thupha kipie ding hi.

³A inn sung vuah neilelam le haunate om ding a, tuale a thumanna uzong kumtawnin a kip hi.

⁴Thuman mite adingin khuomiel sungah amate khuovah bangin a tang uhi; amate pen a migi, mi hepi siem, le midihte ahi uhi.

⁵Kiphal tahin mi sum palahsah a, thutang tawh vaihawmin a gamta mite tungah thu a hoi hi.

⁶Bangzieh ahei cile midihte kiling ngai lo ding hi; kumtawnin amate a kiphawh zing ding hi.

⁷Amate in thusie kithangte a giing sih uhi; TOPA’ sungah a lungsim uh kipin a kho hi.

⁸Amate a lungmuong hit hiet vua, amate a zau vawt sih ding uhi; a tawpna-ah amate in guolzawna tawh a galte a en ding uhi.

⁹A hlawnna-in a hawm vua, mizawngte tungah a pie uhi; amau’ dihna kip tawntung hi; amau’ ki kitawisang hi.

¹⁰migilote in mu-in a lungthah uhi; A ha uh gawi-in amate a mangthah ta uhi; migilote’ lungtup bangma lo a suoh hi.