Read Zou LAPITE 115 Bible Online

LAPITE 115 - Zou bible

LAPITE 115

¹Ko tungah hi loin, TOPA aw, ko tungah hi loin, na itna kip le na thumanna hangin na min in minthanna nga taheh.

²Bang dingin minamte in, “A Pasien uh hei-a om ahei?” ci laizang ding uh ahei?

³Vantungah i Pasien uh om hi; ama in a dei popo a sem hi.

⁴Amau’ milimte pen kham le ngun hi lel a, tuate mihingte’ khut tawh kibawl ahi bo hi.

⁵Tuate in kam a nei vangun a ham thei sih uhi; mit a nei vangun khuo a mu thei sih uhi.

⁶Amate in bil a nei vangun khuo a za thei sih uhi; nahkuo a nei vangun a gimnam a thei sih uhi.

⁷Amate in khut a nei vangun a tham thei sih uhi; amate in keng a nei vangun, lam a pei thei sih uhi; a lawlhawm un zong aw a gingsah thei sih hi.

⁸Tuate a bawlte le tuate a muong zosiete, tuate ma tawh kibang ahi uhi.

⁹Israel aw, TOPA muong in! Ama pen amau’ hupa le amau’ kidalna lum ahi hi.

¹⁰Aaron innkuonte aw, TOPA muong un! Ama pen amau’ hupa le amau’ kidalna lum ahi hi.

¹¹No TOPA a zatah mite aw, TOPA muong un! Ama pen amau’ hupa le amau’ kidalna lum ahi hi.

¹²TOPA in eite ei phawh hi; ama in eite thupha ei pie ding hi; ama in Israel innkuon thupha a pie ding hi; ama in Aaron innkuonte thupha pie ding hi;

¹³ama in TOPA a zatahte a lien a neu-in thupha pie ding hi.

¹⁴TOPA in noma le na tate na nipi-un hing pungsah taheh.

¹⁵Vantung le leitung a bawl TOPA in note thupha hing pie taheh.

¹⁶Vantungte ahile TOPA’ vantungte ahi a, ahi vangin ama in mihingte tungah leitung a pie hi.

¹⁷Misite in ahi a, gamdaina sunga a peisuh poma in ahi zongin TOPA a phat sih uhi.

¹⁸Ahi vangin tuhun a kipanin TOPA i phat zing ding uhi. TOPA phat un!