Read Zou LAPITE 13 Bible Online

LAPITE 13 - Zou bible

LAPITE 13

¹La makaipa kunga David’ laphuo. TOPA aw, bang tanvei sawt lai ding ahei? Kei ei mangngil suoh ding na ta amah? Ka kung panin bang tanvei na maitang sel lai ding na hei?

²Ka lungsim sungah bang tanvei gimna[17] thuohin sunthapai-in ka lungsim da lai ding ahei? Bang tanvei kei tungah ka galpa kitawisang lai ding ahei?

³Ngaisun inlen ei dawng in, TOPA ka Pasien aw! Ka mitte hing vahsah in, tua hi sihle sina kimutna sungah ka kimu ta ding a,

⁴tuale ka galpa in, “Ama ka zo ta hi,” ei ci kha ding hi; keima ka citun ahi ziehin ka galte lungdam ding uhi.

⁵Hizongle keima in na itna kip ka muong hi; nangma’ ei hutdamna sungah ka hlagau a kipah ding hi.

⁶Nang in kei nei limbawl ziehin TOPA tungah la ka sa ding hi.