Read Zou LAPITE 135 Bible Online

LAPITE 135 - Zou bible

LAPITE 135

¹TOPA phat un! I Pasien’ inn huong sung, TOPA’ inn sunga a ding, TOPA’ nasemte aw, TOPA’ min phat un.

³TOPA phat un, azieh pen TOPA hoi hi; ama’ min phatna la sa un, azieh pen ama in mi hepi hi.

⁴Bangzieh ahei cile TOPA in ama dingin Jacob teel zo a, ama’ neisa dingin Israel teel zo ta hi.

⁵Azieh pen keima in TOPA lien hi, ci ka thei hi; i TOPA uh pen pasien-te zosie sangin lienzaw hi.

⁶Vantung le leitung, tuipite le a thuhna zosiete sungah TOPA in a dei bangin na sem hi.

⁷Leimong panin meiilumte a kaisah pa ama ahi hi; ama in guo a zuh nadingin tunphesah a, tuale a kholna panin hui pusuohsah hi.

⁸Egypt gam sungah mihing le ganhing tacil zosie a vatmai pa ama ahi hi;

⁹Egypt aw, Pharaoh le a nasem zosie a do nadingin ama in nangma sungah lim le na lamdangte a sawl hi.

¹⁰Ama in minam tampi vatmai-in kumpi thahatte that hi.

¹¹Amor-te’ kumpipa Sihon, Bashan kumpipa Og, Canaan kumpite zosie that a,

¹²amau’ leitang, ama’ mi Israel-te, gouluo dingin a pie hi.

¹³TOPA aw, na min kumtawnin kip a, TOPA aw, na minthanna khang tawntungin kip hi.

¹⁴Azieh pen TOPA in ama’ mite tungah thukhen a, ama’ nasemte tungah lainatna nei ding hi.

¹⁵Minamte’ milimte pen mihingte’ khut tawh kibawl, ngun le khamte ahi bo hi.

¹⁶Tuate in kam a nei vangun a ham thei sih uhi; tuate in mit a nei vangun khuo a mu thei sih uhi;

¹⁷tuate in bil a nei vangun khuo a za thei sih vua, tuate’ kam sungah naahu a om sih hi.

¹⁸Tuate a bawl mite, tuate a muong mite zosie pen tuate ma tawh kibang ding uhi.

¹⁹Israel innkuonte aw, TOPA phat un! Aaron innkuonte aw, TOPA phat un!

²⁰Levi innkuonte aw, TOPA phat un! TOPA a zatahte aw, TOPA phat un!

²¹Zion panin Jerusalem-a a teng TOPA in thupha nga taheh. TOPA phat un!