Read Zou LAPITE 138 Bible Online

LAPITE 138 - Zou bible

LAPITE 138

¹David’ laphuo. TOPA aw, ka lungsim zosie tawh nangma tungah lungdam kang ko hi; keima in pasien-te mai-ah nangma phatna la-in ka sa hi;

²na biehinn siengtho lam nga-in ka kun a, tuale nangma’ itna kip le na muonhuoina ziehin, na min kang phat hi; azieh pen nang in sil bangkim na min le na thu na tawisang zo hi.[253]

³Kang hlat ni-in nei dawng a, ka hlagau thahatna na khangsah hi.

⁴TOPA aw, leitung kumpi zosie in nangma ang phat ding uhi, azieh pen amate in na kam tawh na thugente a za zo uhi.

⁵TOPA’ minthanna lien mama ahi ziehin amate in TOPA’ nasepna ziete la-in a sa ding uhi.

⁶Azieh pen TOPA a sangpi hinanle, ama in tuolngiem mite don a, gamlapi panin a kiphasah mite a mu veve hi.

⁷Hahsatna kawmkalah ka pei vangin ka galte’ lungthahna panin nei kem hi; Nangma in na khut na zah a, na zietlam khut in ei hunkhie hi.

⁸TOPA in kei dinga a tupna a tangtun ding hi; TOPA aw, na itna kip tawntung hi. Na khuta na sepsate nuasie sin.