Read Zou LAPITE 139 Bible Online

LAPITE 139 - Zou bible

LAPITE 139

¹La makaipa kunga David’ laphuo. TOPA aw, nang in kei nei kan a, nei thei zo ta hi.

²Nang in ka suh ka to na thei hi; ka ngaisutnate nang in gamlapi panin na thei hi.

³Ka lampi le ka lupna na long dawh a, ka gamtatna zosie na thei hi.

⁴TOPA aw, ka kam panin thu khat ka gen masang nangawnin, nangma in ka thugen ding teng a unpi-in na thei zo hi.

⁵Nangma in ka nua ka ma-ah nei dal a, keima tungah na khut na ngam hi.

⁶Tam banga nei theina pen kei adingin lamdang mama hi; tua khu a san seng ziehin ka thei ban zo sih hi.

⁷Nangma’ hlagau kung panin kei hei-ah pei ding ka hei? Nangma’ opna mun panin kei hei-ah tai ding ka hei?

⁸Vantungah kato leng lah tua sungah nang na om hi; Misikhuo lupna-in nei nan leng zong tua sungah nang na om veve hi.

⁹Zingmawng’ hlate tungah tuongin tuipi mong dongah teng zong nan leng,

¹⁰nangma’ khut in tua mun nangawnah ei peipi a, nangma’ zietlam khut in keima ei tudet ding hi.

¹¹Keima in, “Khuomiel in ei tuom valon hinlen, ka kima om khuovah zan khuomiel suoh heh,” ci ta leng zong,

¹²nangma adingin tua khuomiel nangawn a miel tuon sih hi; tuami zan pen sun nitang tawh kibang hi, azieh pen nang adingin tua khuomiel khuovah bang hi.

¹³Azieh pen ka pumpi sunglam nate a siem nangma na hi hi; nangma in ka nu’ gil sungah keima nei phan ditdet hi.

¹⁴Nang in a giinhuoi le a lamdanga kei nei bawl ziehin nangma kang phat hi. Nangma’ nasepnate lamdang mama hi; tua khu ka thei siem mama hi.

¹⁵A thuhna leisiet mun simtham ah ei kiguonggatin ei kisiem laitahin, nangma kung panin ka gu ka tangte a kisel sih hi.

¹⁶Nangma in a kipiengsah nai lo ka pumpi nate na mit in a mu hi. Tuate khat beh a op masang, ka ni za ding zosie a kise lai-in, nangma’ laibu sungah tua thu teng zosie kigiel zo hi.

¹⁷Pasien aw, na ngaisutnate kei dingin bangza-in manpha ahei! Tuate zosie a kigawmna bangza-in zai ahei!

¹⁸Tua tengpi ka sim sawm ciengin, senel sangin a tamzaw hi; a sim ka man zo ta hi,[254] nang tawh ka omton lai hi.

¹⁹Pasien aw, migilote that lacin, keima kung panin sisan a luongsah mite a kihem pan bep ding uhi.

²⁰Gitlo lungsim tawh nangma’ thu a gen mite in nangma’ siet nadingin na langkhatah a pang uhi!

²¹TOPA aw, nang ang mudate ke’n zong muda hi lo ka mah? Nangma langpanga a ding mite ke’n kidah hi lo ka mah?

²²Ke’n amate ka tah muda hi; amate galte bangin ka tuot hi.

²³Pasien aw, keima ei kancien inlen, ka lungsim ei thei in; keima ei sittel inlen, ka ngaisutnate ei thei in.

²⁴Ka sungah gitlona lampi[255] khatpo a om kha amah ei en inlen, tawntung lampi-ah ei pui in.[256]