Read Zou LAPITE 140 Bible Online

LAPITE 140 - Zou bible

LAPITE 140

¹La makaipa kunga David’ laphuo. TOPA aw, sietna bawlte kung pan kei ei hunkhie in; mi tatsiete kung panin keima ei dal in.

²A lungsim sung vuah amate in thusie a gel vua, gal a phuong mielmuol uhi.

³Amate in gulpi’ leii bangin a leii a hiemsah vua, a leii dangnei vuah muoltan’ gu a om hi. Selah

⁴TOPA aw, migilote khut panin keima ei cing in; ka pua nading a gel mi tatsiete kung panin keima ei dal in.

⁵Mi kiphasahte in thang ei siedap vua, amate in lenthang[257] zahin lamdung ah ei sie uhi. Selah

⁶Keima in TOPA kungah, “Nang ka Pasien na hi hi; keima’ ang thumna aw ei ngai in, TOPA aw,” ka ci hi.

⁷TOPA, keima’ TOPA, a thahat ei hunkhie pa aw, gal kido hun ciengin nangma in keima’ lu nei tuompieh zo hi.

⁸TOPA aw, nang in migilote’ deina pie vawt sin; a gitlo sawmnate uh maban sotsah sin. [258] Selah

⁹Ei kimkot mite in a lu a domsang uhi;[259] a zuouthu gente uh amau’ lu tungah tu taheh!

¹⁰Amate tungah mei-am kiesuh taheh! A thawkia zo nawn lo nadingun dum sungah amate kiesuh ta uheh!

¹¹Gam sungah mi gensiete kikipsah sih heh; sietna in mi tatsiete mallang tahin sulzui taheh!

¹²TOPA in mi cimawte’ thu a vaihawmpieh a, ama in mizawngte adingin tangtaha a khen lam ka thei hi.

¹³Thu man mite in nangma’ min ang phat valon ding uhi; nangma’ opna munah mi thumante a teng ding uhi.