Read Zou LAPITE 146 Bible Online

LAPITE 146 - Zou bible

LAPITE 146

¹TOPA phat un! Ka hlagau aw, TOPA phat in!

²Keima in ka hin laisie TOPA ka phat ding hi; ka hin sung tungtawnin TOPA phatna late ka sa ding hi.

³Ei panpi thei lo uliente le mihingte muong sin.

⁴A husan uh a tawp ciengin amate lei lahah a kilekia uhi; khum ni ma-in amau’ gelnate a mangthai sieng hi.

⁵A panpi dinga Jacob Pasien a nei, amau’ TOPA Pasien sunga kinepna a nei mite thupha nga ahi uhi.

⁶Ama in van le lei, tuipi le a sunga om zosie a bawl hi; a tawntungin ama in upna kemcing den hi;

⁷ama in a kibawlsie mite adingin thu a tangin khen hi; a gilkielte an a pie hi. TOPA in thongkiete a suohtasah hi;

⁸TOPA in mittawte khuo a musah hi. TOPA in a kiniemkhiehte a domsang hi; TOPA in midihte a it hi.

⁹TOPA in pemtate kem hi; ama in pa nei lote le meigongte panpi a, ahi vangin migilote’ gamtatna suhsietpieh hi.

¹⁰Zion aw, khang tawntungin TOPA na Pasien a maang den ding hi. TOPA phat un!