Read Zou LAPITE 147 Bible Online

LAPITE 147 - Zou bible

LAPITE 147

¹TOPA phat un! I Pasien tungah phatna late i sah ding hoi hi; azieh pen hepina tawh ama kidim a, phatna la i sah ding a kilawm ahi hi.

²Jerusalem khuopi khu TOPA’ lam ahi hi; ama in a kipampaih Israel mite kaikhawm hi.

³Ama in lungsim kitamzante damsah a, amau’ liemnate zong a tuompieh hi.

⁴Ama in aasite a pha za ding se hi; tuate zosie a min uh phuo hi.

⁵I TOPA uh lien a, a kicing vanglietna nei hi; ama’ theitelna pen tezawh ding ahi sih hi.

⁶TOPA in a kituoncilte lamto hi; ama in migilote tuoldenna-in nei hi.

⁷Lungdamkona tawh TOPA tungah lasa un; lyre lasahna tawh i Pasien uh tungah la ngaih sa un.

⁸Ama in meiilum tawh vante tuom a, leitung ading guotui bawlin, muoltangte tungah lopa posah hi.

⁹Ama in ganhingte le va-ah note a ham uh ciengin an a pie hi.

¹⁰Ama’ lungkimna khu sakol thahatna ahi sih a, ama’ nopsahna khu a tai mipa’ kalhatna[267] zong ahi sih hi.

¹¹Hinanle ama a zatah mite le ama’ itna kip sunga kinepna a nei mite tungah TOPA a lungkim hi.

¹²Jerusalem khuopi aw, TOPA phat in! Zion aw, na Pasien phat in!

¹³Bangzieh ahei cile ama in na tunkot zawlte tosah a, na sunga a om na tate thupha a pie hi.

¹⁴Ama in na gamgi zui-ah lemna[268] ang pie hi; mangbu hoi pente tawh nangma ang gilvasah hi.

¹⁵Ama in a thupiehna leitungah a sawl hi; a thu mallangtahin a tungsah hi.

¹⁶Ama in tuumul bangin vuakhal ei pie hi; ama in vut bangin daitui a thezah hi.

¹⁷Annengkie bangin ama in gieltang a khiesuh hi. Koi in thuoh zo ding ahei?

¹⁸Ama in thupie a, tuate tui a suoh hi; ama in a hui langsah a, tuite zong a luong pai hi.

¹⁹Ama in Jacob tungah ama’ thu gen a, Israel tungah a thukhamte le a ngaina kipte a gen hi.

²⁰Tua bangin ama in minam dang khat popo tungah a bawl ngai sih hi; amate in a ngaina kipte a thei sih uhi. TOPA phat un!