Read Zou LAPITE 17 Bible Online

LAPITE 17 - Zou bible

LAPITE 17

¹David’ laphuo. TOPA aw thutang kang ngetna ei za inlen, ka kikona ngai in; a zuou lo ka nephu tawh kang thungetna na bil na daw in.

²Na kung panin ka dihtanna hing peisah in; na mit in thuman musah in.

³Ka lungtang sittel inlen, zanin ka kungah hing haw-in, ei ze-et lacin ka sungah gitlona na mu sih ding hi; ka kam in zong bangma a genkhiel sih hi.

⁴Midangte’ gamtatna tawh kisai-in ahile, na nephu pana kammal ziehin mi tatsiete’ lampite ka pelh zo hi.

⁵Na lampite-ah kip tahin ka kalsuon hi; ka keng a kitawnkhaw sih hi.

⁶Pasien aw, nangma kang hlan hi, azieh pen nang in nei dawng ding hi; na bil ei ngat inlen, ka thugente ei za in.

⁷A galte uh kung panin na zietlam khutah kibuhna a suite hundam pa aw, lamdang tahin na itna kip hing lah in.

⁸Na mitnauta bangin kei ei kem in; na hla hlim nei-ah ei phuol inlen,

⁹ei bawlsie migilote le ei imtawm a giinhuoi ka galte kung panin keima ei phuol in.

¹⁰Amau’ lungtang in hepina a nei sih uhi; a kam utawh amate a kiphatsah ham uhi.

¹¹Amate in ei sulzui uhi;[21] tu-in amate in ei kui-im uhi; amate in tuol den nadingin mittuhna-in ei nei uhi.

¹²Amate ahile a elmal nuom humpi tawh a kibang vua, humpi khanglai sabuh tawh a kibang uhi.

¹³TOPA aw, hing tho in, amate tawh kimaituo inlen thalpai in! Hinanle na namsau tawh migilote kung panin ka hinna ei hunkhie in,

¹⁴TOPA aw, mihingte lah panin- na khut tawh- tam leitunga a hinkhuo vuah tanh a nei mite kung panin ei hunkhie in. Amate dinga na kholpieh nate tawh a gilpi uh kidim taheh. A tate un khamval nei ta uheh; amate in a nausente vua dingin kimkhat nuasie uheh.

¹⁵Kei ka hi leh dihna tawh na maitang ka en ding hi; ka khahlaw ciengin nang tawh ka kisutna mu-in ka lung a kim ding hi.