Read Zou LAPITE 18 Bible Online

LAPITE 18 - Zou bible

LAPITE 18

¹La makaipa kunga TOPA’ nasem David’ laphuo. Tami la sunga thu kigente khu TOPA in a galte zosie’ khut sung pan le Saul’ khut sung pan ama a hutkhiet ni-a David in TOPA kunga a na phuo late ahi hi. Ama in: Ka thahatna TOPA aw, nangma kang it hi.

²TOPA pen ka suongpi, ka kulpi le keima ei hunkhie pa ahi a, ka Pasien, ka kibuhna ka suongpi, ka lum, ka kihutdama ki, le ka munkip ahi hi.

³A phattah TOPA ka hlan a, tuaci’n ka galte khut sung panin ei kihundam ding hi.

⁴Sina khauhuolte in kei ei vielcip hi; sietna tuihuolte in keima ei nawh hi;

⁵Misikhuo khauhuolte in keima ei kanbawm hi; sina thangte in zong kei ei dawntuo uhi.

⁶Ka lungdon hunin TOPA ka hlan a; huna ngenin ka Pasien kungah ka kiko hi. Ama in biehinnpi panin ka aw ei za a, ama kunga ka kikona in ama’ bil a va banto ta hi.

⁷Ama a lungthah ziehin leitung kipumpei-in kivei hi; muol zung teng zong kinuhin a kiling gawp hi.

⁸Ama’ nahvang panin meikhu pusuoh to a, a kam panin a hulvam thei mei a pusuoh hi; ama tung panin mei-am kuongte pusuoh hi.

⁹Vante niemsahin ama ang kumsuh hi; a keng nei-ah miel sapi a om hi.

¹⁰Cherub khat tungah ama tuongin a leng hi; hui hlate tungah ama mallang tahin a leng hi.

¹¹A kituom nadingin ama in a kimkotah khuomiel bawl a, a tungkhu dingin tui le meiivom sapite a bawl hi.

¹²A mai-a khuovah sung panin gielpite le mei-amte a kileh vapual a, meiilum a phukeh hi.

¹³TOPA in zong vante-ah vantosah a, tuale Sangpen Pa a awng vapo[22] hi.

¹⁴Ama in thaltangte kapin amate a thezah hi; ama in tun phesah a, amate a khenkhe hi.

¹⁵Tua ciengin TOPA aw, na hosietna le na nahkuo vang panin na husan in a semmang ziehin tuipi tawdopte kimu siengin, leitung bulpite kidawh sieng hi.

¹⁶Ama in a sangna panin ei zamsuhin ei la hi; ama in tui thuhpi sung panin keima ei kaidawh hi.

¹⁷Ama in a thahat ka galpa kung pan le ei mudate kung panin keima ei hunkhie hi; azieh pen kei adingin amate a hat seng uhi.

¹⁸Amate in ka tuosiet hunin kei ei dawntuo uhi; hizongle TOPA pen kei ei panpi pa ahi hi.

¹⁹Ama in mun tanzauna ah keima ei peipi hi; kei tungah ama lungkim ahi ziehin ama in kei ei hunkhie hi.

²⁰Keima’ dihna dung zui-in TOPA in thaman ei pie hi; ka khut siengthona dung zui-in ama in kei ei dinkia hi.

²¹Bangzieh ahei cile keima in TOPA’ lampite ka zui zo ta a, ka Pasien kung panin gitlona tawh ka piel sih hi.

²²Azieh pen ama’ thukip zosie keima mai-ah om a, ama’ thupiehte keima kung panin ka paimang sih hi.

²³Ama mai-ah kawh ka baang sih a, khielna panin ka kikem hi.

²⁴Tua ahi ziehin TOPA in ka dihna le ama’ muna-ah ka khutte a sienthona tawh kizui-in keima ei dinkia zo hi.

²⁵Thuman mite tungah thuman na lah a, kaw baanglote tungah na kaw baanlona na lah hi.

²⁶A siengthote tungah na siengthona na lah hi; a lungkawite tungah na letatna na lah hi.

²⁷Bangzieh ahei cile nang in a neilut mite na hunkhie a, hinanle nangma in mi kiphasahte na niemkhieh hi.

²⁸Keima’ meivah ei tanpieh khu nangma na hi hi; TOPA ka Pasien in ka khuomiel a vahsah hi.

²⁹Nangma hang tawh keima in galkap honpi ka nuoimat a, ka Pasien hang tawh keima in khuopi kul ka kan zo hi.

³⁰Tami Pasien- ama’ lampi bukim a, TOPA’ kamciem a manna kilang hi. Ama a beel zosie adingin ama kidalna lum ahi hi.

³¹Bangzieh ahei cile TOPA cilo, Pasien koi ahei? I Pasien simlo suongpi koi ahei?

³²Thahatna tawh ka kawng ei gapieh a, ka lampi ei humbih pieh pa khu Pasien ahi hi.

³³Ama in ka kengte, sazuhpi’ keng bangsah a, ama in a sangna munah keima bihtahin eikoi hi.

³⁴Galdo dan dingin ka khutte ei sinpieh a, tuaci’n ka bante in sumngo thal kuoi zo hi.

³⁵Na hutdamna lum kei nei pie zo a, na zietlam khut in kei nei panpi zo hi; nei panpina[23] in kei ei thupisah hi.

³⁶Nangma in ka nei-ah ka kalsuon nading mun tanzau nei pie a, tuale ka keng a kitawnkhaw sih hi.

³⁷Keima in ka galte delin amate ka nuaphah hi; amate sigam masangin ka nuakia sih hi.

³⁸A thawkia zawh lo nadingun keima in amate ka satlia a, ka keng nei-ah a pua uhi.

³⁹Azieh pen nangma in gal sim nadingin thahatna tawh ka kawng nei gapieh a, ka nei-ah kei ei dote na siel hi.

⁴⁰Nangma in ka galte na letaisah a, keima ei mudate ka susie hi.

⁴¹Panpina ngenin a kiko vangun, amate a hundam ding koima a om sih hi; TOPA tungah a kiko vangun, ama in amate a dawng sih hi.

⁴²Huipi mai-a leivui bangin amate ka satvui a, gawldunga buon bangin amate ka paimang hi.

⁴³Nang in mite[24] tawh ka kihauna pan keima nei hunkhie hi; nangma in minamte’ lutangin keima nei bawl hi; ka thei ngai lo mite in keima’ na a sem uhi.

⁴⁴Amate in ka thu a zah behun ka thu a mang pai uhi; gamdang mite hing pei-in keima ei maivil uhi.

⁴⁵Gamdang mite a lungkie vua, tuale mun muonhuoite panin a citunsa-in ang pei uhi.

⁴⁶TOPA hing hi! Ka suongpi in thupha nga hinlen, ka hutdamna Pasien tawisangin om taheh,

⁴⁷ama pen phu ei lahpieh pa le ka nei-ah minamte ei koipieh Pasien ahi hi.

⁴⁸Ka galte kung panin kei ei hunkhie pa ahi hi; nangma in ka langte tungah kei nei tawisang tahpi hi; nang in mi tatsiete kung panin keima nei hunkhie hi.

⁴⁹TOPA aw, tam thu ziehin minamte lahah kang phat ding a, na min phatna la ka sa ding hi.

⁵⁰Ama in a kumpipa tungah guolzawna lienpite pie-in, a sathau nu pa David le ama’ suonlehlahte tungah kumtawnin a itna kip a lah hi.