Read Zou LAPITE 19 Bible Online

LAPITE 19 - Zou bible

LAPITE 19

¹La makaipa kunga David’ laphuo. Vantungte in Pasien’ minthanna gengen a; vanpi[25] in zong a khuta a nasepnate a tangkoko hi.

²A nini-in thu a gen vua, a zanzanin theina a pulah uhi.

³Thugenna om loin, kammal zong om lo hi; a aw uzong kiza lo hi;

⁴hinanle a aw[26] uh leitung muncin tengah kizel a, a kammal uh leimong dongah a tung hi. Ama in ni adingin vante-ah[27] puonbuh khat lam a,

⁵mopina innsung panin ang pusuoh mopa le, a taina lampi-ah lawptaha a tai mi thahat pa tawh kibang hi.

⁶Vanmongte panin ang suoh a, a mong khat dong kimvel hi; ama’ satna panin a kiphuol thei bangma a om sih hi.

⁷TOPA’ thukham bukim a, hlagau a thasuosah hi; TOPA’ thukhennate a man hi a, mimawte pilsah hi;

⁸TOPA’ ngainakipte sieng a, lungsim nuomsah hi; TOPA’ thupiehte siengtho a, mitte vahsah hi;

⁹TOPA zatahna pen sieng a, kumtawnin kip suoh hi; TOPA’ ngaina kipte man a, a ni-in dih tuoh hi.

¹⁰Kham le kham hoi tampite nangawn sangin tuate deihuoizaw hi; khuoizu le khuoibal zu a hlita dildel sangin hlumzaw lai hi.

¹¹Tham loin tuate ziehin na nasempa in thuhilna ka thuoh hi; tua thute zuina-ah thaman thupi a om hi.

¹²Hinanle a khielna uh koi in mukhie thei ahei? Phuolsel khielnate panin keima ei siengsah in.

¹³Mawnop teiteina[28] panin na nasempa ei kem inlen, ka tungah tuate in ei uhsah sin. Tua ciengin kaw baang nawn loin, khielna lienpi panin ka sieng ta ding hi.

¹⁴TOPA ka suongpi le ka tanpa aw, ka kama ka thugente le nang adingin ka lungsim ngaisutnate a sanhuoi suohsah ta in.