Read Zou LAPITE 20 Bible Online

LAPITE 20 - Zou bible

LAPITE 20

¹La makaipa kunga David’ laphuo. Gimna ni ciengin TOPA in nang hing dawng hinlen! Jacob Pasien’ min in nangma hing dal taheh!

²Ama in mun siengtho panin huna hing puoh hinlen, Zion panin nangma panpina hing pie taheh.

³Ama in na biehna zosiete hing phawh hinlen, maipha tawh na meihal biehpiehnate hing sanpieh taheh. Selah

⁴Na lunggulnate hing pie hinlen, na gelna zosie hing tangtungsah taheh.

⁵Na guolzawna-ah kote kipah tahin awngin, ka Pasien uh’ min tawh kote zawna diel ei khaisah in. TOPA in na ngetna zosie hing tangtun taheh.

⁶TOPA in a sathau nu pa a panpi ding tu-in ka thei ta hi; ama in a zietlam khutah guolzawna lienpite tawh a vantung siengtho panin ama a dawng ding hi.

⁷Mi pawlkhat in lengte kisahtheipi-in, pawlkhat in sakolte a kisahtheipi vua, hinanle eite’ kisahtheipi pen ahile TOPA i Pasien uh’ min ahi bo hi.

⁸A nawmsawmin amate a puamat ding vua, hizongle eite i hi leh thoto-in i dingtang ding uhi.

⁹TOPA aw, kumpipa tungah guolzawna pie in; kote in kang hlat[29] ciengun nangma in ei dawng in.