Read Zou LAPITE 22 Bible Online

LAPITE 22 - Zou bible

LAPITE 22

¹La makaipa kunga Sazuh Zing-awh banga sah ding David’ laphuo. Ka Pasien, ka Pasien, bang dinga kei nei nuasie ahei? Nei hu nadinga kang tauna panin bang dinga gamla om dawh na hei?

²Ka Pasien aw, sunin kang kiko vangin nei dawng sih a, zanin kang kiko vangin tawldamna ka mu tuon sih hi.

³Tua hi napi nang na siengtho a, Israel-te’ patawina tungah na to hi.

⁴Ka pu ka pate in nang ang muong uhi; amate in nang ang muong vua, nang in amate na honkhie hi.

⁵Na kungah amate ang kiko vua, amate hutdam ahi ta uhi; . Amate in nang ang muong vua, amate a maizum sih uhi.

⁶Hinanle kei lungpuh ka hi lel a, mihing ka hi sih hi; kei pen midangte’ hosiet le mite’ simmaw ka hi hi.

⁷Ei mu zosie in kei ei zako uhi; amate in keima ei nephenin ei lulawsan uhi.

⁸“Na vaite TOPA ap in; ama kihunkhiesah in, Ama in a lungkimna pa hunkhie taheh!” a ci uhi.

⁹Hizongle nu gil sung pana ei ladawh nang na hi hi; ka nu ang sung nawitui tawh bihtahin nei na kem hi.

¹⁰Ka suo-a kipan nang tungah kang kingam a, ka nu in ei pai lai-a kipanin ka Pasien na hi ta bo hi.

¹¹Hahsatna ang nai-in ei hu ding koima a op lo ziehin, keima tawh a kigamla-in om sin.

¹²Bawngtang tampi in kei ei imtawm vua, Bashan bawngtang hatte in kei ei kimkot uhi;

¹³a samat a ne nuom humpi hawh bangin, amate in a golpi-in a kam ei kahsan uhi.

¹⁴Tui bangin ei kibuosuh a, ka gute kilawimang hi; ka lungtang pen khuoinun tawh kibang hi; ka awp sungah a zulmang hi;

¹⁵beelphokeh bangin ka kam[30] a gawta a, ka khagu-ah ka leiite a beh den vawt ta hi; nangma in sina leivui lahah keima nei siel hi.

¹⁶Azieh pen uite in ei kimkot a, sietna bawl mi honkhat in kei ei kui-im uhi. Ka khut le ka kengte kizieltum[31] sieng zo hi;

¹⁷ka gu zosie ka sim thei hi. Amate in ei dugaw et uhi;

¹⁸amate in ka puonte a hawm vua, ka puonsilte hawm nadingin amate in ai a san uhi.

¹⁹Ahi vangin TOPA aw, hing gamla op sin! Kei ei hupa aw, ei hu dingin hing mallang ta’n!

²⁰Namsau panin ka hlagau ei hunkhie inlen, uite’ thahatna panin ka hinna[32] ei hunkhie in!

²¹Humpi kam panin keima ei hon[33] in!

²²Ka sanggam numei le pasalte[34] tungah na min ka gen ding hi; mi honpite kikhopna laikimah nangma kang phat ding hi.

²³TOPA a zatah mite aw, ama phat un! Jacob’ suon mi zosie aw, ama minthangsah un. Israel’ tate zosie aw, ama zatah un!

²⁴Azieh pen ama in a migenthei pa’ gentheina simmaw bawl loin, zong a huo vawt sih hi. ama in keima[35] kung panin a mai a phuol sih a, ama kunga ka[36] kiko ciengin ama in keima ei za hi.

²⁵Mihonpi lahah kang phatna khu nang kung pana ang pei ahi hi; ama a zatah mite mai-ah ka thuciemna ka bawl ding hi.

²⁶Mizawngte[37] in an ne-in a lungkim ding uhi; ama a suite in TOPA phat ding uhi. Na lungtangte uh hing den taheh!

²⁷Leimong zosie in phawhin TOPA kungah a kile ding uhi; minam innkuonte zosie in ama[38] mai-ah a bie ding uhi!

²⁸Azieh pen uhna khu TOPA-a’ hi a, ama in minamte tungah vai a hawm hi.

²⁹Hi hi, leitunga a kimu mi zosie[39] in ama mai-ah[40] a kun ding uhi. Kei ka hi leh ama adingin ka hing ding a,[41] leivui lahah a peite zosie ama mai-ah a kun ding uhi.

³⁰Suonlehlahte in ama’ na a sem ding uhi; khangsawnte tungah TOPA’ thu kigen ding a,

³¹a suoh nai lote tungah ama’ sepsa hotkhietna thu tangko ding uhi.