Read Zou LAPITE 27 Bible Online

LAPITE 27 - Zou bible

LAPITE 27

¹David’ laphuo. TOPA khu ka khuovah le ka hutdamna ahi hi; koi pen giing ding ka hei? TOPA khu ka hinkhuo adingin ka mun muonhuoi[52] ahi hi; koi pen giing ding ka hei?

²Ka langte le ka galte ahi, sietna a bawl mite in ka sa netum nuomin ei galbawl ciengun, amate kisukha-in a pua sieng ding uhi.

³Galkap honkhat in phuol satin ei do nan ule ka lungsim a zau sih hi; kei ei langpangin gal a pien vangin ka lungmuong veve ding hi.

⁴TOPA kungah na khat ka ngen zo hi, tua ngenin ka sui ding khu: ka hin sung tungtawnin TOPA’ inn sungah tengin, TOPA’ hoina velvel a, ama’ biehinnpi sunga thu ka dawh ding ahi hi.

⁵Azieh pen ama in hahsat hunin a buh sungah ei phuol ding hi; ama in a puonbuh khuna nei-ah kei ei humbih ding hi; ama in suongpi khat tungah keima ei sangkoi ding hi.

⁶Tu-in ka kimvela om ka galte tungah ka lutang kidomsang ding a, ama in lungdamin kikona tawh ama’ puonbuh sungah biehpiehnate ka pie ding hi; keima in TOPA tungah la ngaite ka sa ding hi.

⁷TOPA aw, ka kinah ko ciengin ei za in, ei hepi inlen ei dawng in!

⁸Ka lungtang in, “Hing pei in, “A mai sui vai!” ei ci hi. TOPA aw, na mai ka sui hi.

⁹Ka kung panin na mai phuol sin. Na lungthah ziehin na nasempa ei nuangat sin, nang ei panpi pa na hi hi. Kei ei paimang loin ei nuasie sin, ka hutdamna Pasien aw!

¹⁰Ka nu ka pa in ei nuasie leh, TOPA in kei ei pom ding hi.

¹¹TOPA aw, na lampi ei hil inlen, ka galte ziehin lam phei-ah ei peipi in.

¹²Ka langte’ deina-ah ei ap sin, bangzieh ahei cile ka langkhatah teci zuoute a pang ding vua, tatsietna hu a sang uhi.

¹³A hingte gam sungah TOPA’ hoina a mu dingin kei ka ki-um hi.

¹⁴TOPA lamen in; thahat inlen, na lungsim hangsah in, TOPA lamen in!