Read Zou LAPITE 29 Bible Online

LAPITE 29 - Zou bible

LAPITE 29

¹David’ laphuo. Van mite[54] aw, TOPA-a’ ci un, minthanna le thahatna khu TOPA-a’ ci un.

²Ama ’ min thupina khu TOPA-a’ ci unlen, a siengtho kizepna tawh TOPA bie un.

³Tuipite tungah Topa’ awging a om hi; minthang Pasien khu vanto bang a, tui hatte tungah TOPA a om hi.

⁴TOPA’ awging khu a vanglien ahi hi; TOPA’ awging khu thupina tawh a kidim ahi hi.

⁵TOPA’ awging in taamtah singte a kuoitan hi; TOPA’ in Lebanon taamtah singte zong a kuoitan hi.

⁶Ama in Lebanon le Sirion-te, bawngno le gamsielno bangin kitomsah hi.

⁷TOPA’ awging meikuong bangin a taang hi.

⁸TOPA’ awging in gamlah a lawhthing hi; TOPA’ awging in Kadesh gamlah zong a lawhthing hi.

⁹TOPA’ awging in gangpi singte a vingvei[55] a, gammang tulah hawhkhie-in pawn gawta suohsah hi; a biehinn sunga om zosie in, “Minthanna!” a ci uhi.

¹⁰Tuikhang tungah TOPA a to hi; tawntung kumpi-in TOPA a to hi.

¹¹TOPA in a mite tungah thahatna pie taheh! TOPA in a mite nopna thupha pie taheh!