Read Zou LAPITE 30 Bible Online

LAPITE 30 - Zou bible

LAPITE 30

¹Biehinnpi Siensuona-a kisa ding David’ laphuo. TOPA aw, nangma kang patawi ding hi, bangzieh ahei cile nang in keima nei phongto a, keima tungah ka galte na lungdamsah sih hi.

²TOPA ka Pasien aw, na kungah panpi ngenin kang kiko a, tuale nangma in kei nei damsah zo hi.

³TOPA aw, Misikhuo panin ka hlagau na peipito a, Leihawm[56]-a peisuhsate lah panin nei hingsah kia hi.

⁴No a misiengthote aw, TOPA tungah phatna la sa unlen, ama’ min siengtho tungah lungdamna ko un.

⁵Azieh pen ama’ lungthahna khu bano khat sung beh ahi bo hi; ama’ angvanna ahile khantawn muon ding ahi hi. Zanlai-in dana ang gieh pah kha thei ding a, ahi vangin zingmawng tawh nopna ang tung hi.

⁶Keima ka hi leh, ka cithei lai-in, “Ka kiling ngai sih ding hi,” ka ci hi.

⁷TOPA aw, nei angvanna tawh a kip muol bangin keima nei phutdet hi; nang in na mai na phuol a, kei ka lung a mang hi.

⁸TOPA aw, na tungah kang kiko a, TOPA tungah thumna kang nei hi:

⁹“Leihawm sungah peisuh leng, keima’ sina ah bang metna om ahei? Leivui in nang ang phat diei mah? Na muonhuoina a gen ding amah”

¹⁰TOPA aw, ei za inlen, keima ei hepi in! TOPA aw, keima ei hupa hing hi ta’n!

¹¹Nangma in ka da ka kaanate lamna-in nei heipieh zo hi; nangma in ka la-ip puonpi nei sutpieh zo ta a, lungdamna puon nei silsah hi,

¹²tuaci’n ka hlagau[57] dai op loin, nangma ang patawi ding hi. Keima’ Pasien TOPA aw, lungdamna kang ko zing ding hi.