Read Zou LAPITE 32 Bible Online

LAPITE 32 - Zou bible

LAPITE 32

¹David’ laphuo. Maskil khat.[62] A khielna kimaisah a, a mawna kiselpieh mite mi hampha ahi hi.

²TOPA in mawna a khuhsah lo mite, a lungsim sungah solna a om lo mite khu mi hampha ahi uhi.

³Ka mawna pulah loin ka dai op sungin, sunthapai ka tautauna lamin ka pumpi a thanem gawp hi.

⁴Sun le zanin kei tungah na khut a gih ziehin, khal nisa in ei kah bangin ka tha ka zung teng gawta[63] sieng vawt hi. Selah

⁵Tuaci’n nangma kungah ka mawna kang pulah a, ka khielna ka im sih hi; “TOPA kungah ka khielnate ka pulah ding hi,” ka ci a, tuale nangma in ka maw ka khielna teng nei maisah hi. Selah

⁶Tua ziehin thuman mi zosiete in lungkham hun sungin[64] na kungah thu ngen uheh; tua hile tuikhang liente in amate a ban sih ding hi.

⁷Nang pen kei adingin ka kibuhna mun na hi hi; nang in buoina panin kei nei kem hi; hutkhiet lungdamna kikonate tawh kei nei kimkot hi. Selah

⁸Keima in thu kang hil ding a, na pei nading lampi kang hil ding hi; ka mit tawh hing enin kang kikuppi ding hi.

⁹Theitelna nei lo sakol le laa bangin om sin, tuate a zuol nadingin kamkaih vaw kul a, tua hi sihle na gei-ah ang om lo ding hi.

¹⁰Migilote in gimna tampi a thuoh vua, ahi vangin TOPA a muong mite ahile itna kip in amate a kuikip hi.

¹¹Midihte aw, TOPA sungah kipahin lungdam unlen, lungsim man mi zosie aw, lungdamin awng un.