Read Zou LAPITE 34 Bible Online

LAPITE 34 - Zou bible

LAPITE 34

¹ Ama a hawlkhie Abimelech’ mai-ah a maw kipang in a pei hun lai-a David’ laphuo. Keima in hun zosie-ah TOPA ka phat ding hi; keima in ka kam tawh ama phatna ka gengen ding hi.

²TOPA sungah ka hlagau a kisa thei hi; a kiniemkhieh mite in za-in lungdam uheh.

³Keima tawh TOPA liensah un, eite in ama’ min tawisang ton va vui.

⁴Keima in TOPA ka sui hi, ama in ei dawng a, ka zau na zosie panin kei ei hunkhie hi.

⁵Ama en unlen, na[65] mai tangsah un; tuaci’n na mai uh a zum ngai sih ding hi.

⁶Tam mi hepihuoi pa kiko a, tuale TOPA in a za hi, a gentheina zosie panin ama a hundam hi.

⁷Ama a zatah mite’ kimvelah TOPA’ vantungmi in giephuol satin amate a hunkhie hi.

⁸TOPA’ hoina ciem unlen, thei ta un; ama a beel mite thupha nga ahi hi.

⁹No mi siengthote aw, TOPA zatah un, azieh pen ama a zatahte in tasapna a nei sih uhi.

¹⁰Humpi khanglaite in tasap le gilkiel thuoh nan uleh, TOPA a sui mite ahile sil hoi bangma a kitasam sih hi.

¹¹Tate aw, hing pei unlen, hing ngai un; keima in note TOPA zatahna kang hil ding hi.

¹²Sil hoite mu thei nadingin, koi pen in hinna dei-in, koi pen in damsawtna lunggul ahei?

¹³Sietna panin na leii kemcing unlen, zuouthu genna panin na nephu kemcing un.

¹⁴Sietna panin kihem unlen, sil hoi sem un; kilemna sui unlen, na phah dongun del un.

¹⁵TOPA’ mit in midihte en a, a kikona lam vuah a bil ngat hi.

¹⁶Leitung pan a kiphawna uh a phietmai dingin, TOPA’ maitang in sietna a bawl mite langpang hi.

¹⁷Panpina ngen dingin midihte a kiko ciengin TOPA in za a, a gentheina zosie uh panin amate hunkhie hi.

¹⁸Lungsim kitamzante kungah TOPA nai om a, ama in lungsim kitamzante a hundam hi.

¹⁹Midihte’ thuohna a tam vangin, tua teng zosie panin TOPA in amate hunkhie hi.

²⁰Ama in amau’ gu zosie kem hi; tuate khat beh zong a tawng sih hi.

²¹Sietna in migilote sina tun a, mi dihte a mudate kimawsah ding hi.

²²TOPA in a nasemte’ hinna tanh ding a, ama a beel mite koima kimawsah lo ding hi.