Read Zou LAPITE 38 Bible Online

LAPITE 38 - Zou bible

LAPITE 38

¹Phawna Biehna dinga David’ laphuo. TOPA aw, a lungthahsa-in kei thu ei hil sinlen, na thangpai cieng zong thu ei hil sin.

²Azieh pen ka sungah na thaltangte ang tum a, ka tungah na khutte ang tu zo ta hi.

³Na lungthah ziehin ka ci ka sa a dam thei sih hi; ka mawna ziehin ka gu ka tangte a khau thei sih hi.

⁴Azieh pen keima’ khielnate in ka luzang ei vuanelh ta hi; keima adingin tuate pen a gih mama van tawh kibang hi.

⁵Ka motlawm ziehin ka liemnate naikulin uithan hi;

⁶nahpitahin ei kikun sahin, ei kikhupbawh sah hi; da le kapin sunthapai-in ka vah kawikawi hi.

⁷Azieh pen ka kawng zang teng meikah tawh kidim sieng a, ka ci ka sa sungah damna kici a om sih hi.

⁸Nahpitahin ei kizo gawpin ka tha a tawpmang ta hi; ka lung a gim ziehin thumin ka tautau hi.

⁹TOPA aw, nang in ka dei zosie na thei hi; ka khuisahnate ahile na kung pan phuolsel ahi sih hi.

¹⁰Ka lungtang a kisai a, ka thahatna tawp zo hi; ka mit in zong khuo a mu thei ta sih hi.

¹¹Ka genthei thuohna ziehin ka lawm ka guolte a kidangkoi vua, ka innvengte zong gamlapi-ah a om uhi.

¹²Kei ei tha sawmte in thang ei sie uhi; ka nat nading a suite in siet nading thu beh genin, sunthapai-in mi sol ding beh lungngai-in a nei uhi.

¹³Hinanle kei ka hi leh bilbing ka bang a, khuo ka za sih hi; a ham thei lote bangin ham loin ka om hi.

¹⁴A tahtahin ci lei kei pen bil khuo za lo le, a kam pana a thuhkia ngai lo mipa tawh ka kibang hi.

¹⁵Ahi vangin TOPA aw, keima in nang kang ngah hi; TOPA ka Pasien aw, kei ei dawng pa nang na hi hi.

¹⁶Azieh pen, “Ka kitawnkhaw ciengin, kei tunga thangpha mite, kei ziehin lungdamsah sin,” ci thu beh kang ngen hi.

¹⁷Bangzieh ahei cile kei a pua ding ka hi ta a, ka natna a kam thei sih hi.

¹⁸Keima in ka khielna ka pulah hi; ka mawna ziehin ka da mama hi.

¹⁹A thu om lopi-in[74] ka galte a thahat mama vua, a man lopi-a ei mudate a tam mama uhi.

²⁰A hoi gamta ka hi ziehin hoina pen sietna tawh ei thuhte ka galte ahi hi.

²¹TOPA aw, kei ei nuasie sin; ka Pasien aw, ka kung panin gamla op vawt sin;

²²ka hutdamna TOPA aw, ei hu dingin hing kinaw ta’n.