Read Zou LAPITE 40 Bible Online

LAPITE 40 - Zou bible

LAPITE 40

¹La makaipa kunga David’ laphuo. Lungduoitahin TOPA ka ngah hi; kei lam hing kinga-in ka kikona ei za hi.

²Ama in sietna dum[76] sung le buonnawi lah panin ei kaidawhin, suongpi tungah ka keng ei koipieh a, ka kalsuonnate kipsah hi.

³Ama in ka kam sungah i Pasien phatna la tha khat ei koipieh hi. Mi tampi in mu-in a zatah ding vua, amate in TOPA a muong ding uhi.

⁴A muonna uh TOPA hisah a, mi kiphasahte lamah kihei loin, pasien man lote lamah a piel lote thupha nga ahi uhi.

⁵TOPA ka Pasien aw, na sepna lamdangte le kote dinga na ngaisutnate tampitah na phasah zo hi; nang pen koima dang tawh tekah thei ding na hi sih hi. Tam thute tangko-in gen ding hileng sim zawh loin a tam hi.

⁶Nang in biehpiehna le silpieh na lunggul sih a, ahi vangin nang in ka bil nei honpieh zo hi.[77] Nang in meihal biehna le mawna zieha biehna na kal sih hi.

⁷Tua ciengin keima in, “Tanah ka om hi; laiziel bupi sungah ka thu kigiel hi.[78]

⁸Keima in na deina banga sep ding nuom ka sa hi, ka Pasien aw; ka lungtang sungah na thukham a om hi,” ka ci hi.

⁹Keima in mihon tampite lahah hutkhiet lungdamna thu ka gen zo ta hi; en in,TOPA aw, na thei bangin keima in ka nephute ka kham zo sih hi.

¹⁰Na hutdamna dinga nei panpina keima in ka lungtang sungah ka phuolsel sih a, keima in na muonhuoina le na hutdamna thu ka genkhie zo hi; Mihonpi panin na itna kip le na muonhuoina ka imcip sih hi.

¹¹TOPA aw, ka kung panin na khuotuona humcip sin; na itna kip le na muonhuoina in keima ei kembih den taheh.

¹²Azieh pen sim zawh lo sietnate in keima ei kimkot hi; khuo ka mu thei lo ding za dongin ka khielnate in kei ei nuaphah zo hi; ka samzam sangin a tamzaw vua, ka lungsim a tawp hi.

¹³TOPA aw, nei hut ding hing lungkim in; TOPA aw, kei ei hu meng in.

¹⁴Tha dinga kei ei sui kawikawi zosie maizumsah inlen, buoisah in; ka siet nading a dei mite nuakia sah inlen minsiesah in.

¹⁵Keima tungah, “Aha, Aha!,” ei cite maizumin cizalia sah in.

¹⁶Ahi vangin nang ang sui zosie, nang sungah lungdam kipah hinlen; na hutdamna a dei mite in, TOPA lien hi!” ciden ta uheh!

¹⁷Kei ka hi leh zawngin ka cimaw a, hinanle TOPA in kei ei phawh den hi. Nang ei panpi pa le ei hunkhie pa na hi hi; hing kiheh sin, ka Pasien aw.