Read Zou LAPITE 41 Bible Online

LAPITE 41 - Zou bible

LAPITE 41

¹La makaipa kunga David’ laphuo. Mizawng[79] a khuolte thupha nga mi ahi hi; lungkham hun ciengin TOPA in amate hunkhie hi.

²TOPA in amate dalin a hingsah ding hi; amate pen gam sungah thupha nga mi kici ding hi. Nang in a galte deina bangin amate na pie sih hi.

³A cinatna a lup muntung vuah TOPA in amate khoi ding hi; nangma in amau’ cinat hun sungin a damlona zosie uh na damsah zo hi.[80]

⁴Kei dingin hi leh, “TOPA aw, ei hepi inlen, ei damsah in; bangzieh ahei cile nang tungah kang mawzo hi,” ka ci hi.

⁵Kei bang hun ciengin si-in, ka min a mangthai diei, ci thu thangsietna tawh ka galte in a ngaisun uhi.

⁶Kei ei en dinga ang pei ciengun, thu mawhna vive a gen vua, a lungsim sung vuah sietna kaikhawmin, a peikhiet ciengun tuate a genthaang uhi.

⁷Kei ei muda zosiete in keima’ thu a kihodap uhi; amate in kei adingin a sie penpen ngaisun uhi.

⁸Ka lupna pana thokia zo lo dingin si theina natna in ei mancip hi, ci-in a ngaisun uhi.

⁹Ka muon ka lawm it pa, keima’ an a ne pa nangawnin a aaketul tawh keima ei peh kawi viel hi.

¹⁰Ahi vangin TOPA aw, amate ka thuh thei nadingin, keima ei hepi inlen, ei phongto in.

¹¹Ka galpa in kei ei zaw lo ziehin, kei tungah nang lungkim lam tami thu tawh ka thei hi.

¹²Ahi vangin ka citah ziehin nang in kei nei panpi a, nangma’ opna munah kumtawna om dingin nei koi zo hi.

¹³Israel Pasien TOPA in kumtawn pan kumtawn dongin thupha nga taheh. Amen, Amen.