Read Zou LAPITE 44 Bible Online

LAPITE 44 - Zou bible

LAPITE 44

¹La makaipa kunga Korah-te phuo Maskil [83]khat. Pasien aw, tanglai amahaw’ hin lai-a na silbawlsate, ka pu ka pate in ei gen vua, ka bil utawh ka za zo uhi:

²Nangma in na khut tawh minamte na notmang a, hizongle nangma in amate na tengsah hi; Nang in mite na bawlsie a, hinanle amate na suohtasah hi;

³azieh pen a namsau beh utawh amate in gam a lah uh ahi sih a, a baan thahat beh un zong amate guolzawna pie lo hi; na zietlam khut, le na baan le na maitang khuovah hang hizaw hi, bang ding ahei cile amate sungah nang na lungkim hi.

⁴Nang ka Kumpipa le ka Pasien na hi hi; nang in a guolzaw nadingin Jacob thu na pie[84] hi.

⁵Nangma ziehin ka galte ka sawnpua uhi; nangma’ min ziehin ei do mite ka tuoncil uhi.

⁶Azieh pen ka thalpi ka muong sih a, ka namsau in zong ei hun zo lo hi.

⁷Ahi vangin ka galte panin nang in nei hun a, ko ei muda mite na amtawngsah gawp hi.

⁸Pasien sung ah ka ki-angtangsah zing uhi, kumtawnin kote in na min ka phat den ding uhi. Selah

⁹Hinanle nang in ko ei nuolin nei thusim ta sih a, ka galkap honte tawh zong na kuonton sih hi.

¹⁰Ka galte kung panin nei nuakiasah a, ka galte un ka neisate a la ta uhi.

¹¹Nang in a kigo ding tuu bangin kei nei bawl a, minam dangte lahah nei thethaang zo hi.

¹²Nang in tawmno khat tawh na mite na zua zo a, nang in amau’ man ding na sang nget sih hi.

¹³Nang in ka vengte’ zako, ka kim ka pamte’ simmaw le nuisat dingin nei bawl zo hi.

¹⁴Minamte lahah a sie lam thugentena, mite lahah nuizat nopna-in[85] kote nei bawl zo ta hi.

¹⁵Sunthapai-in ka mai-ah mindaina om a, kei ei tawhte le ei hosie mite’ thugen ziehin, ka galte le phula mite’ mai-ah zumna in ka maitang a tuom mang ta hi.

¹⁷Ka tung vuah tam thu zosie hing tung nanle kote in nang kang mangngil sih vua, na thuciemna ka palsat sih uhi.

¹⁸Ka lungsim uh kinua hei loin, ka kalsuonna uzong nangma’ lampi panin a piel tuon sih hi.

¹⁹Hinanle nangma in ngie-te opna munah nei balnen a, khuomiel thuhpi tawh kei nei tuommang hi.

²⁰Ka Pasien uh’ min mangngilin pasien dang tungah ka khutte uh a zah zo hi mawh uleng,

²¹Pasien in tam thu mu loin a om mawh ding amah? Bangzieh ahei cile ama in lungsima phuolselte a thei hi.

²²Nangma ziehin sunthapai-in kote ei kithat a, a kigo ding tuu bangin ei kingaisun hi.

²³TOPA aw, bang dinga kimu na hei? Hing tho in, khanglo inlen, keima ei nuasie zing sin!

²⁴Bang dinga na mai na phuol ahei? Bang dinga ka gentheina ule ei kibawlsietnate na mangngil ahei?

²⁵Bang ding ahei cile leivui lahah ka pua uhi; ka pumpi uh tuol ah a lum hi.

²⁶Hing thoto inlen kote ei hu in. Nangma’ itna kip na khuolna tawh kote ei tankhie in.