Read Zou LAPITE 45 Bible Online

LAPITE 45 - Zou bible

LAPITE 45

¹La makaipa kunga Unoh paate’ awkai-a kisa ding Korah-te’ phuo zawl la khat. Maskil[86] khat. Thuhoi khat tawh ka lungtang ang dimlet hi; kumpipa kungah ka latengte ka va sut ta hi; ka leii lai-at siempa laikung tawh kibang hi.

²Mite lahah nang na hoi pen hi; na nephu tungah hepina kibuosuh hi; tua ahi ziehin Pasien in kumtawnin nang thupha ang pie zo hi.

³A thahat mipa aw, na phei ah a vangnei le a thupi na namsau kuo in.

⁴Thutah ading le thuman humbih[87] nadingin na thupina tawh guolzo tahin tuong in; na zietlam khut in a dipkuot huoi nasepte kihilsah in.

⁵Na thaltangte hiem mama a, tua khu kumpipa galte’ lungtangah tu-in, na nei-ah mite a pua hi.

⁶Pasien aw, kumtawnin na kumpi topha kip den hi. Na kumpi ciengkhut zong thumanna ciengkhut ahi hi;

⁷nang in thudih na dei a, gitlona na muda hi. Tua ziehin Pasien ahi, na Pasien in lungdamna sathau hing nu-in, na khanguolte tungah ang sangkhan zo ta hi;

⁸na puontuolpite myrrh, aloe le thalsing namtuite’ gim a nam hi. Saiha tawh kibawl kumpi innpi panin khausai lasahnate in nangma ang kipahsah hi;

⁹na numei thupite lahah kumpite’ tanute a om uhi; nangma’ zietlamah Ophir kham tawh a kizem kumpi nu a ding hi.

¹⁰Tanu aw, za in, ngai sunin na bil ei ngat in; na mite le na pa’ inn mangngil inlen,

¹¹nang melhoi na hi ziehin kumpipa in ang deigaw ding hi. ama na topa ahi ziehin ama mai-ah kun in.

¹²Mihau pente ahi Tyre mite[88] in

¹³nei le lam namcin tawh letsongte tawi-in na maipha ang sui ding uhi. Ama’ innkhan sungah kham tawh kigan puontuolte tawh kumpipa’ tanu kizem hi;

¹⁴mel tuomtuom a nei puontuolpi silin kumpi kungah tua nu kipeipi hi; ama’ nua-ah ngahnu siengthote le a lawm a guolte in a zui uhi.

¹⁵Kipahna le lungdamna tawh amate kizawpi a, kumpipa’ inn sungah a lut uhi.

¹⁶Kumpipa aw, na pu na pate’ tangin tapate na nei ding hi; nang in leitung mun zosie-ah amate, gam-uhte na suohsah ding hi.

¹⁷Keima in a khang khangin na min ka kiphawhsah zing ding hi; tua ahi ziehin mite in a tawntungin nangma ang phat den ding uhi.