Read Zou LAPITE 5 Bible Online

LAPITE 5 - Zou bible

LAPITE 5

¹La makaipa kunga theile tawh sah ding David’ laphuo. TOPA aw, ka thugente na bil daw in; ka khuisahnate ei don in.

²Ka Kumpi le ka Pasien aw, na kunga thu ngen ka hi ziehin ka kikona ei ngai in.

³TOPA aw, zingmawngin ka aw na za hi; zingmawngin na kungah ka thu hing tutin kang ngah hi.

⁴Azieh pen gitlona nuom a sa Pasien na hi sih hi; nangma tawh sietna omton thei lo ding hi.

⁵Mi kisatheite na mai-ah ding lo ding hi; nangma in sietna bawlte na muda hi.

⁶Nangma in zuouthu gente na susie a, TOPA in sisan suote le mi sol theite a huo hi.

⁷Hizongle a kicing na itna kip ziehin na inn sungah kang lut ding a, na biehinn siengtho lamah zatahna tawh kang kunsuh ding hi.

⁸TOPA aw, ka galte ziehin na thumanna-ah kei ei pui in; ka mai-ah na lampi tangsah in.

⁹Bangzieh ahei cile a kam sung vuah thuman om lo hi; a lungtangte uh zong sietna ding vive ahi hi; a lawl uh pen hankhuh kihongsa ahi a; a kampi utawh mi a mot pawh uhi.

¹⁰Pasien aw, a khielna uh amate ma puosah inlen; amau’ ngaisutna ma tawh amate puasah in; a khielna uh tampite ziehin amate notmang in, bangzieh ahei cile amate in nang ang ledo uhi.

¹¹Hinanle nang ang beel mi zosie kipahsah in; amate in lungdamin la sasah den ta’n. Nangma sungah na min a it mite a kipah thei nadingin amate tungah na dalna puon zah in.

¹²Bangzieh ahei cile TOPA aw, nangma in thumante thupha na pie hi; nangma in angvanna tawh amate lum bangin na sung hi.