Read Zou LAPITE 50 Bible Online

LAPITE 50 - Zou bible

LAPITE 50

¹Asaph’ laphuo. Vanglien TOPA Pasien in nisuo-a kipanin nitum dongin leitung zosie khawmin thu a gen hi.

²Hoina kicinna Zion panin Pasien ang taang hi.

³I Pasien uh ang pei a, a sip dide sih hi, ama mai-ah mi halvam thei meikuong om a, ama kimvelah hui husiepi a om hi.

⁴Ama in a mite thu a khen thei nadingin tunglam vante le leitung hlan hi:

⁵“Biehpiehna tawh kei tunga thuciemna a bawl, ka kungah ka mi citahte hing khawm un,” a ci hi.

⁶Pasien mama thukhenpa ahi ziehin, vantung in ama’ dihna a pholah hi. Selah

⁷Ka mite aw, za un, keima in thu kang gen ding hi, Israel aw, na langkhatah keima teci ka pang ding hi. Kei pen Pasien ka hi a, noma’ Pasien ka hi hi.

⁸Kang phawsietna uh pen na biehpiehna zieh ahi sih hi; na meihal biehna zong ka mai-ah a om den hi.

⁹Keima in na inn panin bawngtang ahi a, na ganbuh panin keelte ahi zongin ka sang sih ding hi.

¹⁰Bangzieh ahei cile gamlah a ganhingte zosie keima-a’ ahi a, muol tul tampite tunga a om ganhingte zong keima-a’ ahi hi.

¹¹Hui lahah[101] vate zosie ka thei a, gamlaha a gamta zosie keima-a’ ahi hi.

¹²“Ka gil a kiel leh nang kang gen sih ding hi, azieh pen leitung le a sunga om zosie keima-a’ ahi hi.

¹³Keima in bawngtang sa ne-in, keelte’ sisan ka dawn amah?

¹⁴TOPA tungah lungdamko biehpiehna pie un,[102] tuale Sangpen Pa tungah na kiciemna tangtun un.

¹⁵Hahsat hun ciengin keima ei hlan un; keima in kang hunkhie ding a, nangma in kei nei minthangsah ding hi,” a ci hi.

¹⁶Ahi vangin Pasien in migilote tungah thu gen a: “Ka thukhamte na gen nading ule na nephu utawh ka thuciemna na gen nadingun, note in thuneina bang nei na hi uh ahei?

¹⁷Bangzieh ahei cile note in khalna na mu da vua, na nua lam vuah khalna na paimang uhi.

¹⁸Guta khat na mu ciengun lawm le guolin na bawl pai vua, a pahtat mite tawh na kigop uhi.

¹⁹Sietna lamah na kam na pie vua, na leii un zuouthu a bawl hi.

²⁰To-in na sanggampa langpangin thu na gen uhi; note in na nu sungkuon na laizomte mama’ minsiet nading na gen uhi.

²¹Tam tengpi na bawl zo ta vua, bangma ka ham sih hi; kei pen noma tawh a kibangin nei ngaisun uhi. Hinanle tu-in kang phawhsie vua, tuale keima in na mai vuah na mawna uh kang lui hi.

²²“Tua ciengin Pasien a mangngil note aw, tami thu na ciemte ta un. Tua hi sihle keima in note kang bottel ding a, ang hunkhie ding koima a om sih ding hi.

²³Biehpieh nadinga lungdamkona ang peipi mi in kei ei patawi ahi hi; keima in dihna lampi[103] a zuite tungah Pasien’ hutdamna ka lah ding hi.