Read Zou LAPITE 55 Bible Online

LAPITE 55 - Zou bible

LAPITE 55

¹La makaipa kunga khausai tumthei-a kisa David’ phuo maskil[119] khat. Pasien aw, ka thungetna ei ngai in; kang thumna panin kiphuol sin.

²Ei ngaipieh inlen,ei dawng in; ka mi mawsahna ziehin ka buoi mama hi.

³Galte’ awging le migilote’ ei gentheisahna ziehin ka buoi hi. Azieh pen amate in kei tungah buoina ang tun[120] vua, lungthahna tawh ei gal bawl ding amate in nuom a sa uhi.

⁴Ka sungah ka lungtang a na a, ka tungah si ding zaunate ang tung zo ta hi.

⁵Ka tungah zauna le linna ang tung a, zausina in ei vuanelh hi.

⁶“Vakhu bangin hla nei leng maw! Ka kilen dawh ding a, ka kikhawl hit hiet ding hi;

⁷gamlapi-ah ka vahthap tahtah ding hi; gampalah-ah ka kigie ding hi; Selah

⁸Keima in hui husiepi pan le pingpeite panin ka kibuh nading ka naw sui ding hi,” ka ci hi.

⁹TOPA aw, a kamham uh buoisah inlen, tawhnawi in; azieh pen khuopi sungah kheltatna le kiselna ka mu hi.

¹⁰A sun a zanin kulpite tungah amate a kuolva kawikawi vua, tua sungah tatkhielna le buoina a om hi;

¹¹tua khuopi laikimah zong sietna a om hi; a vanzuana mun panin bawlsietna le solnate kihemkhie lo hi.

¹²Kei ei tawhte khu ka galte ahi sih a, hi leh ka thuoh zo ding hi; kiphatsahna tawh ei bawlsie pen ka galte ahi sih hi- Hi leh amate kung panin ka kiphuol thei ding hi.

¹³Hinanle ka kikimpi, ka kigoppi, ka melthei mama ka guolpa, nangma na hi a,

¹⁴nangma tawh nuomtahin i kipawl ngai a, Pasien’ inn sungah mihonpi tawh i peiton ngai hi.

¹⁵Amate tungah sina tungsah in; amate, Misikhuo-ah a hingin peisah suh in; azieh pen a inn sung ule a lungtang vuah sietna a om hi.

¹⁶Hinanle keima in TOPA ka hlan a, TOPA in ei hundam ding hi.

¹⁷Nitah, zingmawng, le sunlai-in ka buoina thu genin ka tau vangut a, tuale ama in ka aw ei za ding hi.

¹⁸Ama in ka galdona panin liemna nei loin ei tankhie ding hi, bangzieh ahei cile kei ei do dinga a kiguol mi a tam mama hi.

¹⁹Tangtawng pana kumpi-a kikoi Pasien in, Selah za ding a, tuale amate a sunem ding hi, azieh pen amate kikhel loin, Pasien a giing sih uhi.

²⁰Ka kithuopi pa in a guolpa tungah ama’ khut ngam a, ama in keima tawh[121] a bawl thuciemna a palsat hi.

²¹Thawbat sangin kamham nalzaw a, ahi vangin a lungtang ah gal bawlna a om hi; a kamham pen sathau sangin zolzaw a, hinanle tuate pen namsau dawhsa bang ahi bo hi.

²²TOPA tungah na vangih suon in, ama in ang puohpi ding hi; ama in midihte kilingsah ngai lo ding hi.

²³Hinanle Pasien aw, nang in dumthuh pen sungah amate na sepsuh ding hi; sisan luongsahte le mi solte ahile amau’ hin ding za alang zong a hing sih ding uhi. Ahi vangin keima in nang kang muong ding hi.