Read Zou LAPITE 56 Bible Online

LAPITE 56 - Zou bible

LAPITE 56

¹ Gath ah Philistia-te in ama a mat lai-a Gangpi Sing tunga Vakhu ham kigalzah aw tawh kibanga sah ding David in la makaipa kunga a laphuo Miktam[122] khat. Ka Pasien aw, mite in ei totcil ziehin kei ei hepi in; sunthapai-in amate in kei ei genthei bawl uhi;

²mi tampi in ei do ziehin sunthapai-in ka galte in ei tuoncil uhi. Sangpen Pa aw,

³kei ka zau ciengin, nangma kang muong hi,

⁴keima in a thu ka phat Pasien muongin ka zau sih hi; mihingte in kei bang ei law thei ding ahei?

⁵Sunthapai-in amate in ka nat nading a sui uhi; a ngaisutna zosie uh ka siet nading vive ahi hi.

⁶Amate in kisel nading thu bawlin ei buhdap uhi; amate in ka kalsuonnate ei encih uhi. Ka hinna a lah ding a kinep bangun,

⁷tuaci’n a khielna ziehun amate thuh[123] in; thangpaina tawh tua mite paimang dawh ta’n Pasien aw!

⁸Nang in ka da ka kaanate na ciemte zo ta a, nangma in na thawl sungah ka hlituite na thun hi. Na ciemtena laibu sungah tuate om hi lo amah?

⁹Tua ciengin, keima kang kiko ni ciengin ka galte a nuakia ding uhi. Pasien keima-a’ ahi lam[124] keima in ka thei hi.

¹⁰A thu ka phat Pasien sungah, a thu ka phat TOPA sungah,

¹¹Pasien ka muong hi; kei ka zau sih hi. Mi maimai in kei bang ei law thei ding ahei?

¹²Pasien aw, nangma tunga ka kiciemnate ka zui kul hi; keima in na tungah lungdamko biehnate kang pie ding hi.

¹³Azieh pen nang in sina panin ka hlagau na hunkhie zo a, Pasien’ mai hinna khuovah sungah keima ka pei thei nadingin ka kitawnkhaw nading panin kei nei hunkhie zo hi.