Read Zou LAPITE 57 Bible Online

LAPITE 57 - Zou bible

LAPITE 57

¹ Saul kung suonghawm pan a tai lai-a, la makaipa kunga “Susie Sin,” ci aw tawh sah ding David’ laphuo miktam[125] khat. Kei ei khuotuo in Pasien aw, ka hlagau in nang ang belh ziehin kei ei khuotuo in; sietna huipi a ven dongin, na hla lim nei kang bel ding hi.

²Sangpen Pasien tungah, kei adinga a tupna a tangtungsah Pasien tungah ka kiko hi.

³Ama in van panin hing sawlin keima ei hundam ding a, keima ei tuoncil mite maizumsah ding hi. Selah Pasien in a itna kip le a muonhuoina ang sawl ding hi.

⁴Huoihamna tawh mi sa a ne humpite lahah ka lum hit hiet a, a ha uh tei le thaltang tawh kibang a, a leii uh zong namsau hiemte tawh kibang hi.

⁵Pasien aw, vante tungah kitawisang in. Leitung zosie tungah na minthangsah in.

⁶Amate in ka ketot ah thang a sie uhi; ka hlagau a kunsuh hi. Amate in ka lampi-ah dum a to vua, hinanle tuami sungah amate ma a kie uhi. Selah

⁷Ka lung a kip hi, Pasien aw, ka lung a kip hi. La ka sa ding a, ka gingsah ding hi.

⁸Ka hla aw, khanglo in! Harp le lyre aw khanglo un! Keima in phalvah ka phong ding hi.

⁹TOPA aw mite lahah nang lungdam kang ko ding hi; minamte lahah nangma phatna la ka sa ding hi.

¹⁰Azieh pen na itna kip vantung za-in a sang hi; nangma’ muonhuoina in meiilumte a banto hi.

¹¹Pasien aw, vante tungah kitawisang in. Leitung mun zosie-ah na minthangsah in.