Read Zou LAPITE 58 Bible Online

LAPITE 58 - Zou bible

LAPITE 58

¹La makaipa kunga “Susie Sin,” ci-a sah ding David’ laphuo miktam[126] khat. No pasien-te[127] aw, a manin vai na hawm uh amah? Note in mite tungah a dihin thu na khen uh amah?

²Na khen sih uhi, na lungtang vuah gitlona bawl ding na sawm uhi; na khutte un leitunga tatsietna teng a bawl hi.

³Migilote pen a nu gil sung panin a lampiel zo tham uhi; amate in a suo cil vua kipan khielna a bawl vua, zuouthu a gen uhi.

⁴Gul bangin gu a nei vua, amate in gulsum bilbing bangin a bil a hum uhi,

⁵tuaci’n amate in a hlimte’ aw ahi a, a zolsiemte’ aw ahi zongin a za sih uhi.

⁶Pasien aw, a kam sung vua om a hate uh sutawng in; humpi khanglai’ hapa bawpieh in, TOPA aw!

⁷Tuiluong bangin amate maimangsah in; lopa bangin amate kituoncilin[128] gawtasah in.

⁸Amate a nai lahah a zulmang tawhtol le, a hun cing lo-a a suoh, ni mu nai ngai lo nausen bangsah in.

⁹Na beelsuonte in tua lingkung kuong sa a sah masang, ama in a kuonglai ahi a, a hing lai ahi zongin, a mallangzaw-in phietmang taheh!

¹⁰Phulahna a mu ciengun midihte lungdam ding uhi; amate in migilote’ sisan sungah a keng a sil ding uhi.

¹¹Mite in, “Midihte adingin thaman om tahtah hi; leitungah thu a khen Pasien om tahtah hi,” ci ding uhi.