Read Zou LAPITE 59 Bible Online

LAPITE 59 - Zou bible

LAPITE 59

¹ Saul in David a tha thei nadingin a inn vil dinga mi a sawl hun-a la makaipa kunga “Susie Sin,” ci aw tawh sah ding David’ laphuo Miktam[129] khat. Ka Pasien aw, ka galte kung panin ei hunkhie in; ka langa dingte kung panin keima ei dal in.

²Sietna a bawl mite panin keima ei hunkhie in; sisan luongsah nuom mite panin keima ei hundam in.

³Tu nangawnin amate in tha dingin ei buhdap uhi; keima langkhatah mi thahatte in kisel nading a kuontaw uhi. Azieh pen TOPA aw, ka tawnkhielna le ka mawna zieh hi lo,

⁴ka khielna zieh zong hi lopi-in, amate tai-in a va kithawi ta uhi. Kei ei hu dingin hing tho in!

⁵Nang, Vanglien TOPA Pasien, Israel’ Pasien na hi hi. Minam zosiete dan pie dingin hing tho in; solna tawh sietna bawl sawm mite koima hingkhawi sin. Selah

⁶Nitah sielin amate a kilekia vua, ui bangin hamin, khuo sung tengah vahdap vakhuan uhi.

⁷A kam utawh tuanah nahpi tahin a hawh vua, amate in a nephu utawh kamkhel nono[130] a gen uhi. Azieh pen, “Koi in ei za ahei?” ci-in amate in a ngaisun uhi.[131]

⁸Ahi vangin TOPA aw, nang in amate na nuisan lel hi; nang in minamte zosie na zapi hi.

⁹Ka thahatna aw, nang kang ngah ding hi; azieh pen Pasien aw, nangma ka kulpi na hi hi.

¹⁰Ka Pasien in ama’ itna kip tawh keima ei na dawn ding hi; ka Pasien in guolzawna tawh ka galte ei ensah ding hi.

¹¹Amate that sin, na tha leh ka mite in mangngil kha ding uhi; nangma in na thahatna tawh amate vahvaisah inlen, amate niemsah in, ka lum uh ahi, TOPA aw.

¹²Bangzieh ahei cile a kam utawh a mawna uh, a nephu utawh a hamna ziehun, a kisahtheina sung vuah amate awhsah in. Azieh pen amau’ gen samsietna le zuouthu ziehin,

¹³thangpaina tawh amate netum inlen, a tawp sieng dongun amate netum in. Tuaci’n Pasien in Jacob tunga a uhna thu leimong dongah kithei ding hi. Selah

¹⁴Nitah sielin amate kilekia-in ui bangin a ham vua, khuo sung tengah vahdap vakhuan uhi.

¹⁵An sui-in a vah kawikawi vua, kham a nga zo sih uleh mi teng a ngih uhi.

¹⁶Hinanle keima in na thahatna la-in ka sa ding a, zingmawngin na itna kip phatna la ngai tahin ka sa ding hi. Azieh pen kei adingin nang kulpi na hi a, ka genthei cienga ka kibuhna na hi hi.

¹⁷Ka thahatna aw, nangma phatna late ka sa ding hi, azieh pen Pasien aw, ka kulpi na hi a, itna kip ei lah Pasien na hi hi.