Read Zou LAPITE 61 Bible Online

LAPITE 61 - Zou bible

LAPITE 61

¹La makaipa kunga tumging khausai tawh sah ding David’ laphuo. Pasien aw, ka kikona ei za in; ka thungetna ei ngaipieh in.

²Ka lung a gim ciengin leimong panin nang kang hlan hi. Kei sanga a sangzaw suongpi kungah kei ei pui in;

³bangzieh ahei cile nang, ka kibuhna na hi a, galte langkhatah a muonhuoi tausang na hi hi.

⁴Na puonbuh sungah kumtawnin ei tengsah inlen, na hlate’ hutna hlim nei-ah kibuhna ei musah in. Selah

⁵Azieh pen Pasien aw, nang in ka thuciemte na za zo hi; nangma’ min ang zatah mite’ luo ding gougil kei nei pie zo hi.

⁶Kumpipa hing khansausah in; ama’ khankum zong khang zosie adingin kip zing taheh!

⁷Ama Pasien’ mai-ah kumtawn kumpi hi taheh; itna kip le muonhuoina in ama kembih taheh!

⁸Tuaci’n nisimin ka thuciemna kang pieh ma bangin, a tawntungin na min phatna late ka sasa ding hi.