Read Zou LAPITE 64 Bible Online

LAPITE 64 - Zou bible

LAPITE 64

¹La makaipa kunga David’ laphuo. Pasien aw, ka phunna aw ei za in; galte zauna panin ka hinna ei kem in.

²Migilote’ sawmdapnate, sietna bawlte’ vaihawmna,

³namsau tat banga a leii uh a tat mite, thaltang banga thu hoilo tawh mi a dawite,

⁴a buhdapna panun genbaang lo mi kapte panin keima ei lie in; amate in zau vawt loin thakhatin a kap uhi.

⁵A thusie ngaisutnate uh amate in a tudet uhi; a thang dapsie ding thu a gen vua, “Koi in eite[137] ei mu ding ahei?

⁶Eite’ mawna[138] koi in kantel zo ding ahei? Kupil tahin i dapgel zo uhi,” ci-in a ngaisun uhi. Bangzieh ahei cile mihing lungtang le lungsim thuh mama hi.

⁷Hinanle Pasien in amate a thaltang tawh a kap ding hi; amate thakhatin liem gawp ding uhi.

⁸A leii ziehun ama in amahaw sietna[139] thuohsah ding hi; amahaw a mu kha zosie in zau-in ling ding uhi.

⁹Tua ciengin mi zosie a zau ding uhi; amate in Pasien’ piensah thute a gen ding vua, ama’ sepsa thute a ngaisunsun ding uhi.

¹⁰Midihte in TOPA sungah lungdamin ama bel ta uheh. Lungsim mante zosie in ama phat taheh.