Read Zou LAPITE 69 Bible Online

LAPITE 69 - Zou bible

LAPITE 69

¹La makaipa kungah Unoh paate’ aw tawh sah ding David’ laphuo. Pasien aw, ei hundam in, bangzieh ahei cile tuite in ka ngawng cieng ang ban ta hi.

²Keng hlah nading om lona mun buonnawi lahah ka tumsuh hi; buonnawi thuh sungah ka tumsuh a, pansie ding a om vawt sih hi; tuithuh sungah ka tumsuh a, tuikhang in kei ei vuanel hi.

³Ka kikona-in ka gim gawp hi; ka dang zong a gawta hi. Keima in Pasien ka ngangana-in ka mitte a miel ta hi.

⁴A hang om lopi-a ei mudate, ka lu tunga samzamte sangin a tamzaw uhi; kei ei susie ding mi tam mama a, ka galte in zuouthu tawh kei ei mawsah uhi. Keima in ka guh lopi tu-in piekia ding ka mah?

⁵Pasien aw, nangma in ka motna na thei a, nangma kung panin ka tatkhielnate kisel lo hi.

⁶Vanglien TOPA Pasien aw, keima ziehin nangma ang lamen mite, maizumna thuohsah sin; Israel Pasien aw, keima ziehin nangma ang sui mite mindaisah vawt sin.

⁷Nangma ziehin keima in zakona ka thuoh a, maizumna in ka mai a tuom hi.

⁸Ka sanggamte lahah gelta ka suoh ta vanuh a, ka nu sunga ka suopite lahah zong khuolmi ka suoh ta hi.

⁹Na inn ka deiluotna in keima ei netum hi; nang ang hosiete’ hosietna teng keima tungah ang tu ta hi.

¹⁰Keima in an tangin[147] lungsim ka kiniemkhieh ciengin, tua banga ka bawl ziehin amate in keima ei zako uhi.

¹¹Puon bangin la-ip ka sil ciengin a thusie gentena uh ka suoh hi.

¹²Kei pen tunkot gei-a a to mite’ gensiet lel bepin ka om a, zukhamte in keima’ thu la-in a sa uhi.

¹³Ahi vangin TOPA aw, na kungah thu kang ngen hi. A kiningcing na itna kip tawh a kisan thei hunin ei dawng in, Pasien aw. A muonhuoi na panpina tawh

¹⁴buonnawi lahah ka tumsuh nading panin keima ei suohtasah in. Tuithuhte le ka galte kung panin keima ei hunkhie in.

¹⁵Tuikhang in keima ei vuanelsah sinlen, buonnawi thuhpi in zong ei valtumsah sin, ahi sihle keima tungah Leihawm in a kam ei khanelsah sin.

¹⁶TOPA aw, na itna kip a hoi ziehin keima ei dawng in; a kiningcing nangma’ khuotuona dung zui-in kei lam hing kinga in.

¹⁷Na nasempa kung panin na mai phuol sinlen, cimaw zo ta ka hi ziehin, keima ei dawng meng in.

¹⁸Kei lam ei neh inlen, ei tankhie in, ka galte kung panin ei suohtasah in.

¹⁹Ka thuoh gensietna, maizumna, le mindaina na thei hi; nangma in ka galte zosie na thei zo hi.

²⁰Kigensietnate in ka lungsim tamzan sah a, tuaci’n ka lung kie dihdeh hi. Ei khuotuo ding mi ka sui a, ahi vangin koima a om sih hi; ei henem ding mi ka sui a, ahi vangin koima ka mu sih hi.

²¹Amate in an tangin gu ei pie vua, ka dangta ciengin dawn ding tuithua ei pie uhi.

²²Amahaw adingin a sabuoi uh thang suohsah inlen, a kipawlpite adingin piel suohsah in.

²³Amate in a mu thei lo dingin a mit uh mielsah inlen, a tawntungin a kawng uh kithingsah in.

²⁴Amate tungah na lungthahna sungsuh inlen, tuale nangma’ sinsona in amate bansah in.

²⁵Amau’ giephuol gamkhing suohsah in; a puonbuh sung vuah koima tengsah sin.

²⁶Azieh pen amate in na satgawp mite a bawlsie vua, tuale na liemsah mite zong a sim sawnsawn uhi.[148]

²⁷Amau’ khielna tungah khielna belap in; amate in nang kung panin suotahna nga sih ta uheh.

²⁸A hingte’ laibu sung panin amate kiphietmang taheh; midihte lahah a min uh kikhum sih heh.

²⁹Ahi vangin keima ei kiniem bawl a, na ka sa hi; Pasien aw, na hutdamna in keima ei dalsah in.

³⁰Keima in la tawh Pasien’ min ka phat ding hi; keima in lungdamkona tawh ama ka liensah ding hi.

³¹Tami in bawngtang khat, ahi sihle ki le kecin tawh bawngtang khat sangin TOPA lungdamsah zaw ding hi.

³²Bawlsietna a thuoh mite in tam thu mu-in kipah ta uheh; no Pasien a sui mite aw, na lungsim nosuosah kia un.

³³Bangzieh ahei cile TOPA in mi cimawte’ aw za a, hentat kolbul a thuoh a mite don loin a om sih hi.

³⁴Vantung le leitung, tuipi le tuate sunga a gamta thei zosiete in ama phat ta uheh.

³⁵Azieh pen Pasien in Zion a hundam a, tuale Judah khuopite a lamkia ding hi; tua sungah a nasemte tengin[149] a luo ding uhi.

³⁶A nasemte’ tate in tua khu a luo ding vua, tua sungah ama’ min a it mite a teng ding uhi.