Read Zou LAPITE 7 Bible Online

LAPITE 7 - Zou bible

LAPITE 7

¹Benjamin-te Cush tungtanga David in TOPA kunga a sah Shiggaion.[5] TOPA ka Pasien aw, nangma kang bel hi; kei ei del zosiete kung panin ei hundam inlen ei hunkhie in,

²tua hi sihle amate in humpi bangin ei ehmal ding uhi; amate in ei kaiphitin ei hun ding koima om lo ding hi.

³TOPA ka Pasien aw, keima in tam bang ka sep khah a, ka khut in sep khiel a nei leh,

⁴sietna tawh ka guolte ka thuhkia a, a hang om lopi-in ka galte ka bulu leh,

⁵galte in kei ei delin ei pha hinlen, lei lahah ka hinna tuoncilin, leivui lahah ka hlagau siel ta uheh. Selah

⁶TOPA aw, a lungthahsa-in hing tho in; ka galte lungsona langah hing dingto in. Ka Pasien[6] aw, hing tho in; nang in thukhenna ding na se zo hi.

⁷Na opna kimah mite kikhawmsah inlen, amate tung a sangna mun topha[7] tungah to in.

⁸TOPA in mite tungah thu a khen hi; TOPA aw, ka thumanna le ka sunga om citahna tawh kizui-in thu ei khen in.

⁹Lungsim le lungtang a sittel a thuman Pasien aw, migilote’ gitlona tawpsah inlen, mi thumante sukip in.

¹⁰Pasien khu ka kidalna lum ahi a, lungsim dih mite a hundam pa ahi hi.

¹¹Pasien khu a thuman thukhen mangpa ahi a, nisiela a lungthah Pasien ahi hi.

¹²Mi khat a kisiakia sih leh, Pasien[8] in a namsau tat hiem ding hi; ama in a thalpi kuoi-in a dawi zo ta hi;

¹³ama in si theina galhiemte a baisa-in koi zo a, ama in a thaltang meisi leng bangsah hi.

¹⁴En in, amate in gitlona gai-in nau bangin ngaisut hoi lona a pai vua, nau a suo bangin zuouthu a suohsah uhi.

¹⁵Amate in dum bawlin a to vua, a bawlsa dum sung ma-ah a kie uhi.

¹⁶A ngaisut hoi lote uh pen a luzang vuah tukia a, a tatsietna uzong a luzang ma vuah a tukia hi.

¹⁷Ama’ thumanna ziehin TOPA tungah lungdam ka ko ding a, Sangpen Pa TOPA’ min phatna la ka sa ding hi.