Read Zou LAPITE 71 Bible Online

LAPITE 71 - Zou bible

LAPITE 71

¹TOPA aw, nang kang bel hi; kei ei maizumsah ngai sin.

²Na dihna sungah ei hun inlen ei suohtasah in; na bil kei lam ei ngat inlen, ei hundam in.

³Kei adingin ka buhna suongpi, ka kulpi muonhuoi[150] hing hi inlen, ei hundam in, azieh pen ka suongpi le ka kulpi na hi hi.

⁴Ka Pasien aw, migilote’ khut sung pan le mi thuman lote le mi gawgamte’ matna panin ei hunkhie in.

⁵Azieh pen TOPA aw, ka kinepna nang na hi a, ka khangno lai-a kipanin ka kimuonna nang na hi hi.

⁶Ka suo cil a kipanin na tungah kang kingam hi; ka nu gil sung panin keima ei ladawh pa na hi hi. Nangma kang phat ngitnget hi.

⁷Kei pen mi tampite adingin a siehil bang ka hi a, hinanle nang a muonhuoi ka kibuhna na hi hi.

⁸Nangma phatna tawh ka kam kidim a, sunthapai-in nangma’ minthanna tawh a kidim hi.

⁹Ka vuoi ciengin kei ei paidawh sin; ka tha a kieh ciengin kei ei nuasie sin.

¹⁰Azieh pen ka galte in keima’ thu a gen vua, ei thatnuomin ei vil mite a kikumkum uhi.

¹¹Amate in, “Pasien in a nuasiesa tua mipa del unlen, man un, azieh pen ama hunkhie ding koima a om sih hi,” a ci uhi.

¹²Pasien aw, keima kung panin gamla op sin; ka Pasien aw, kei ei hu dingin hing mallang in!

¹³Kei ei mawsahte maizumsah inlen, kisiesah in; keima’ siet nading a suite, simmawna le mindaina in tuomcip taheh.

¹⁴Hinanle keima in nang kang lamen den ding a, nangma kang phat semsem lai ding hi.

¹⁵Na dih gamtatnate le na hutdamna nasepnate, ka thei zawh lo za dongin tam tama nan leh, sunthapai-in ka kam in a gengen ding hi.

¹⁶TOPA Pasien’ a thupi nasepte a phat dingin kang pei ding a, keima in na dihna thu beh genin ka nei ding hi.

¹⁷Pasien aw, nang in ka khangno lai-a kipanin thu nei hil zo a, keima in na nasepna lamdangte ka gengen lai hi.

¹⁸Tuaci’n Pasien aw, keima in ang khang lai ding khangtha zosie kungah na hatna ka pholah masangin, kei vuoi-in ka sam a kan cieng nangawnin ei nuasie vawt sin. Pasien aw, na vanglietna

¹⁹le na dihna in van sangpite tung dong banto hi. Na lienpite a sem zo Pasien aw, nang tawh kibang koi om ahei?

²⁰Gimna le tuosietna tampi ei musah nang in kei nei hingsahkia ding hi; nangma in lei thuhpite sung panin keima nei lakhie to ding hi.

²¹Keima ei kizatahna na khangsah ding a, tuale nangma in khatvei keima nei henemkia ding hi.

²²Ka Pasien aw, na thumanna ziehin harp lasahna tawh nangma kang phat ding hi; Israel-te’ Siengpen Pa aw, keima in lyre lasahna tawh na min kang phat ding hi.

²³Nangma phatna ka sah ciengin lungdamin ka nephute awng ding hi; na hutkhietsa ka hlagau zong lungdamin a awng ding hi.

²⁴Ka siet nadinga a hanciemte kimaizumsahin a kiminsietsah zo ziehin, ka leii in sunthapai-in nangma in dihna tawh nei huna a gengen ding hi.