Read Zou LAPITE 72 Bible Online

LAPITE 72 - Zou bible

LAPITE 72

¹Solomon’ laphuo Pasien aw, nangma’ thutang, kumpipa pie inlen, nangma’ thumanna kumpipa’ tapa tungah pie in.

²Ama in dihna tawh na mite thukhen hinlen, na mizawngte, thutang tawh thukhen heh.

³Muol le tangte in thudih tawh mite adingin citheina piengsah taheh.

⁴Ama in mite lahah mizawngte vai panpi hinlen, mi cimawte hutkhietna pie-in, mi bawlsie pa tuoncil taheh.

⁵Ni le hla a op laisie khang tawntungin ama hing[151] taheh.

⁶Ama lopa vatsa tunga a kie, lei a tapnom guotui bang taheh.

⁷Ama’ hun sungin dihna pung hinlen, hlapi a om nawn lo dongin nopna om taheh.

⁸Ama in tuipi khat pan tuipi khat, Gunpi panin leimong dongin uhna nei taheh.

⁹Ama mai-ah a galte[152] lukun uh hinlen, a galte in leivui lieh ta uheh.

¹⁰Tarshish kumpite le tuikul neu-a kumpite in ama tungah sieh le kaihte pie uh hinlen, Sheba le Seba kumpite in letsongte puoh ta uheh.

¹¹A mai-ah kumpite zosie khupboh uh hinlen, minam zosie in ama’ na sem ta uheh.

¹²Azieh pen mi tasamte in a hlat ciengin ama in hunkhie a, a hu ding nei lo mizawngte hunkhie hi.

¹³Ama in thanem le a tasamte hepi a, mi tasamte’ hinna hundam hi.

¹⁴Ama muna-ah amau’ sisan manphasa ahi ziehin, bawlsietna le tatsietna panin ama in a hinna uh tankhie hi.

¹⁵Ama khansau taheh! Ama tungah Sheba khamte kipie taheh. Ama adingin thu kingetpieh zing hinlen, ama dingin sunthapai-in thupha kingetpieh zing taheh.

¹⁶Tua gam sungah an tampi pieng taheh; muol sangte dawnah ante kivihin, a gate zong Lebanon gam sunga bangin hoi thei taheh; tuale gamlah lopate bangin khuopi sung mite khanpha uheh.

¹⁷Ama’ min kip zing ta hinlen, ni a om laisie-in ama’ minthanna om suoh den taheh. Ama’[153] sungah minam zosie in thupha nga ta uheh; amate in ama thupha nga pa, ci ta uheh.

¹⁸Na lamdang bawl pa ama beh, Israel Pasien TOPA in thupha nga taheh.

¹⁹A minthang ama’ min in kumtawnin thupha nga taheh; ama’ minthanna tawh leitung buppi kidim taheh.

²⁰Jessi’ tapa David’ thungetnate a tawp ahi ta hi.