Read Zou LAPITE 74 Bible Online

LAPITE 74 - Zou bible

LAPITE 74

¹Asaph’ Maskil [159]khat. Pasien aw, bang dinga kote ei paimang zing ta na hei? Lonona muna na tuute tungah bang dingin meikhu bangin na lungthahna omsah na hei?

²Tanglai-a na neisa na mihonte, nangma’ gouluo minam dinga na tatkhietsate phawh in. Nangma’ ten nading Zion muol khu hing phawh bo in.

³Kumtawn sietna-ah hing kalsuon in; galte in mun siengtho sunga na zosie susie zo ta hi.

⁴Na mun siengtho sungah na galte hawh vapuoh hi; amate in khum sungah a melcina uh limte a khai uhi.

⁵Amate in tunglam lutna-a kidaw singlangte heipi tawh a phua uhi.[160]

⁶Tua ciengin a kizem na zosie heipi le sehta tawh a satguoi uhi.

⁷Amate in na mun siengtho mei tawh a hal uhi; amate in lei dongin na min kisuonna mun zosie a buasah sieng ta uhi.

⁸Amate in, “Tuate i zo mang ding uhi,” a kici uhi; amate in gam sunga kikhopna mun zosie a halmang uhi.

⁹Kote in melcinate ka mu sih uhi; kamsang khat zong om nawn loin, bang tanvei sawt ding, ci-a a thei kote lahah koima a om sih hi.

¹⁰Pasien aw, galte in bang tanvei ciemmuina-in ei nei ding uh ahei? Na galte in kumtawnin na min a gensiet ding uh a ta amah?

¹¹Bang dingin na khut dawhkia-in; bang dingin na kang sungah na khut koi na hei?

¹²Hizongle tanglai-a kipanin Pasien pen leitungah hutdamna na a sem ka Kumpipa ahi ta bo hi.

¹³Nang in vanglietna tawh tuipi na phalsuo hi; nang in tuite tunga gulpi’ lutangte na satguoi hi.

¹⁴Nang in Leviathan’ lutangte na satguoipieh hi; senel gam ganhingte’ an[161] dingin ama na pie hi.

¹⁵Nangma in tuisam le tuinahte na phulsah hi; nangma in luitui luonglaite na kangsah hi.

¹⁶Sun khu nang-a’ ahi a, zan zong khu nang-a’ ma ahi hi; a tang thei nate[162] le ni zong nangma’ phusa ahi hi.

¹⁷Nangma in leitung gamgi zosie na hlung zo hi; nangma in phalbi hun le khal hun na bawl zo hi.

¹⁸TOPA aw, galte ang nuisat dan le Pasien zatah lo mite in na min ang gensietna uh hing phawh ta’n.

¹⁹Na vakhu’ hinna khu gamsate lahah pie sin; na mizawngte’ hinkhuo hing mangngil zing sin.

²⁰Na[163] thuciemna hing thupisim in, bangzieh ahei cile leitunga a mielna munte, mi tatsiete’ zuolna mun suoh ta hi.

²¹A kituoncil mite maizumsah sin; mizawng le mi cimawte in na min phatsah in.

²²Pasien aw, hing thoto inlen, na thu a dihin hing khen in; Pasien zatah lote in sunthapai-in ang gensietna uh phawh in.

²³Na galte kikona aw mangngil sinlen, ang langpante’ husa ging ang kato zing hi.