Read Zou LAPITE 77 Bible Online

LAPITE 77 - Zou bible

LAPITE 77

¹La makaipa kungah: Jeduthun lakai-a sah ding Asaph’ phuo la khat. Pasien kungah keima a gingin ka kiko a, ama in ei zah nadingin a gingin ka kiko hi.

²Ka lungkham hunin TOPA ka sui hi; keima in zanlai-in gim vawt loin ka khut ka zah hi; ka hlagau a kihenem zo sih hi.

³Pasien ka ngaisun a, tuale ka maumau hi; thu ka lungngaingai ciengin ka lung a gim mama hi. Selah

⁴Nangma in a mit sing dingin keima nei koi sih hi; ka lung a kham sengin ka ham thei va-ia sih hi.

⁵Hun luite ka ngaisun a, nidang lai hunte ka phawh hi.

⁶Zanthapai-in ka lungsimah ka kihoho[170] a, lung gelgelin ka lungsim ka kankan hi:[171]

⁷“TOPA in ei nuol peisuohin, maipha ei piekia ngai nawn lo ding amah?

⁸Ama’ itna kip a tawp suoh ta amah? Ama’ thuciemte zong a maimang suoh ta amah?

⁹Mi lungsiet ding Pasien in a mangngil ta amah? Ama lungthahin a lainatna a khahtan ta amah?” ka ci hi. Selah

¹⁰Keima in, “Sangpen Pa’ zietlam khut a kikhelna khu keima’ gimna ahi hi,” ka ci hi.

¹¹Ka lungsim sungah TOPA’ silbawlte ka phawh ding hi; hun lui lai-a na bawl sil lamdangte ka phawh ding hi.

¹²Na nasepna zosie ka lungngaingai ding a, tuale a lien na silbawlte ka ngaisunsun ding hi.

¹³Pasien aw, na lampi a siengtho hi. Eite Pasien za-a a lien bang pasien om ahei?

¹⁴Nang na lamdangte a bawl Pasien na hi hi; nang in mite lahah na vanglietna na lah zo hi.

¹⁵Nang in na banhat tawh Jacob le Joseph’ suon na mite na tankhie zo hi. Selah

¹⁶Pasien aw, tuite in nangma ang mu ciengun, tuite in ang mu ciengun a zau uhi; tui thuhpi zong a ling hi.

¹⁷Meiite in tui buosuh hi; vante zong to hi; nangma’ thaltangte zong muncin tengah a leng hi.

¹⁸Pumpei sungah na vanto gingpi a om hi; na tunphete in leitung tanvah hi; leitung kilawhin a ling hi.

¹⁹Tuipi tung tawnin lam na hla a, nangma’ lampi pen tuihuolpite tung ahi hi; hinanle na ketotte kimu lo hi.

²⁰Nangma in tuuhonte bangin Moses le Aaron’ khut tawh na mite na pui hi.