Read Zou LAPITE 78 Bible Online

LAPITE 78 - Zou bible

LAPITE 78

¹Asaph’ phuo Maskil[172] la khat. Ka mite aw, kang thuhilna ngai un; ka kam tawh ka gen thute na bil ei ngat un.

²Keima in thugentena zangin ka kam ka kah ding hi;

³i pu i pate in ei gensa, eite in zong i zah i theisa uh, tanglai-a a kigen thuthuhte kang genkhie ding hi.

⁴Eite in a tate kungah tua thute i im sih ding hi; eite in ang pieng lai ding khang thate tungah TOPA’ minthan nasepnate, ama’ vanglietna le a sepsa sil lamdangte i gen ding uhi.

⁵Ama in Jacob’ suonte tungah thupiehna khat bawl a, Israel mite tungah thukham khat koi hi;

⁶tua khu amau’ zaw-a ang khangte le ang suoh nai lo naupangte in thei a, amate in a tate tunga a gensawn thei nading uh ahi hi,

⁷tuaci’n amate in a muonna uh Pasien sungah a nga ding uhi; tuale Pasien’ nasepnate mangngil loin, ama’ thupiehte a zui ding uhi;

⁸amate, a lungkhau a ledo khang mite, Pasien tunga lungsim kip nei lo, lungsim muonhuoi lo khang mite ahi, a pu a pate utawh a kibang sih ding uhi.

⁹Ephraim-te in thalpi a tawi vua,[173] gal kido ni-in amate a nuakia sieng uhi.

¹⁰Amate in Pasien’ thuciemna a zui sih vua, ama’ thukham tawh kituohin amate a gamta nuom sih uhi.

¹¹Amate in a bawlsa le amate tunga a lahsa na lamdangte a mangngil uhi.

¹²Ama in a pu a pate’ mu-in Egypt gam sung Zoan munte-ah sil lamdangte a bawl hi.

¹³Ama in tuipi kikhen sahin, amate a kantansah a, tuite a lompi-in a dingsah hi.

¹⁴Ama in sun hunin meiipi khat tawh ahi a, zanthapai-in meikuong khat tawh ahi zongin amate a pui hi.

¹⁵Ama in senel gama suongpite pawhkeh sah a, ama in tuili thuh pana tui luong bangin, amau’ dawn dingin tui tampitah a pie hi.

¹⁶Ama in suongpi panin luituite luongsah a, tuale guntui luong bangin tuite a luongsah hi.

¹⁷Hinanle ama tungah amate a maw lai veve vua, senel gam sungah Sangpen Pa a ledo uhi.

¹⁸A du mama uh an a ngen vua, a lungsim sung vuah Pasien a zelah uhi.

¹⁹Amate in Pasien a gensie vua, “Pasien in senel gam sungah sabuoi a pha thei amah?

²⁰Tui a phul thei nadingin ama in suongpite satin luituite a luonsah mawh vangin, a mite adingin an zong pie-in sa zong a sih zo ngap ding amah,” a ci uhi.

²¹Tua ahi ziehin TOPA in tua thu a zah ciengin, a nah lungthah mama hi; Jacob tungah mei kitaw a, Israel tungah ama lungthah semsem hi,

²²bangzieh ahei cile amate in Pasien a um sih vua, ama’ hutdamna vanglietna a muong sih uhi.

²³Ahi vangin ama in tung lama om vante thu pie-in ama in van kotte a hong hi;

²⁴amau’ neh dingin guo bangin manna zusah a, vantung an a pie hi.

²⁵Mihingte in vantung mite’ an a ne uhi; ama in amate an tampitah a puoh hi.

²⁶Ama in vantungah nisuona hui langsah a, ama’ vanglietna tawh leitaw lam hui a peikhietpi hi;

²⁷Ama in amate tungah leivui za-a a tam sa guo bangin zusah a, tuipi senel za-a a tam a leng thei vate guo bangin zusah hi;

²⁸ama in amau’ giephuol sung, amau’ tenna kim zosie-ah tuate a kiesah hi;

²⁹ama in a dugaw pen uh pie zo ahi ziehin, amate in ne-in a gilva uhi.

³⁰Hizongle amau’ du pen a kham masang uh, a kam sung vuah tua an a op laitahin,

³¹amate tungah Pasien’ lungthahna tung a, tuale ama in amate sung panin a thahat pen teng that a, paapal tawh a kibang Israel muon le suon teng a vatmai hi.

³²Tam bangin pieng hi tama le amate a maw lailai uhi; amate in ama’ silbawl lamdangte a um tuon sih uhi.

³³Tuaci’n ama in a nite uh husan khat bangin a mangthai dingin bawl a, a khankumte uzong zauna tawh a mangthai dingin a bawl hi.

³⁴Ama in amate a tha ciengin, amate in ama a sui pan na bo uhi; amate a kisiekia vua, lunglut tahin Pasien a sui uhi.

³⁵Amate in Pasien pen amau’ suongpi, a tankhie Sangpen Pasien ahi lam a phawh uhi.

³⁶Hinanle amate in a kampi utawh ama a phat uhi; amate in a leii utawh ama tungah zuouthu a gen uhi.

³⁷Ama tungah a lungsim uh a kip sih hi; ama’ thuciemna-ah amate a tahtai sih uhi.

³⁸Ahi vangin ama in lainatna lungsim a nei ziehin, amau’ khielnate a maisah a, amate a susie sih hi; ama in khat veivei a lungthahna ip zelzel a, a thangpaina zosie a phong sih hi.

³⁹Amate mihing hi lel a, ang peikia nawn lo huilang bang ahina uh ama in a phawh hi.

⁴⁰Amate in gamlahah bang zavei khat ama ledo-in, senel gam sungah lunggimsah uh ahei!

⁴¹Amate in Pasien a zelah thithe vua, Israel’ Siengtho Pa a phinphin uhi.

⁴²Amate in ama’ vanglietna hile, ahi sihle ama in a galte panin amate a tatkhietna ni hile, a phawh kha vawt sih uhi;

⁴³ama in Egypt gam sunga a lah a sil lamdangte hile, Zoan gam sunga a bawl a na lamdangte hile a phawh kha vawt sih uhi.

⁴⁴Amate in a luituite uh a dawn thei lo nadingun, ama in a guntuite uh sisan a suohsah hi.

⁴⁵Ama in amate lahah a pet thei tho honpite, a susie thei uphawhte, amate lahah a sawl hi.

⁴⁶Khuombai neh dingin ama in amau’ ante a pie a, amau’ sepsa gate zong kauphe neh dingin a pie hi.

⁴⁷Ama in a lengguite uh gielpi tawh susie-in, a theithehte uh vuakhal tawh a suhsietpieh hi.

⁴⁸Ama in a bawngte uh gielpi in khiehlia sah a, a tuuhonte uzong keh in a khiehlia sah hi.

⁴⁹Amate tungah a zauhuoi a lungthahna, a thangpaina, a lungkimlona, a lunggimna, le a susie thei vantung mite honkhat ama in hla hi.

⁵⁰Ama in a lungthah nading lampi khat a bawl hi; ama in sina panin amate hinkhawi loin, pul natna-ah amate a pie sieng hi.

⁵¹Ama in Egypt tacil zosie le Ham’ puonbuhte sunga amau’ hatna tawh a pieng ta masa teng a vatmai hi.

⁵²Tua ciengin ama in a mite tuu bangin peipi a, tuuhon bangin senel gamah amate lam a pui hi.

⁵³Ama in muonhuoina munah amate a pui ziehin a zau sih uhi; ahi vangin tuipi in a galte a hlummang hi.

⁵⁴Tuale a zietlam khut tawh a zawsa muol ahi, ama’ muol siengtho tungah amate a peipi hi.

⁵⁵Ama in amau mai-ah minamte a notmang hi; ama in amate luo dingin neisate a hawmpieh a, a puonbuh sung vuah Israel minamte a tengsah hi.

⁵⁶Hinanle amate in Sangpen Pasien zelahin ledo uhi. Amate in ama’ thupieh a zui sih vua,

⁵⁷a pu a pate uh ma bangun kihei-in a thuman sih uhi; a lelama a leng thaltang bangin amate a lampiel uhi.

⁵⁸Bangzieh ahei cile a munsangte utawh amate in ama a lungthahsah uhi; amate in a milimte utawh ama’ hazat nadingin a phongkang uhi.

⁵⁹Pasien in a zah ciengin, ama thangpai mama a, tuale ama in Israel mite a pumnuol kiukeu hi.

⁶⁰Ama in mihingte lahah ama’ opna puonbuh ahi, Shiloh-a ama’ tenna nuasie-in

⁶¹tuale ama in ama’ vanglietna pen sal suoh dingin a pie a, ama’ minthanna zong galte’ khut sungah a pie ta hi.

⁶²Ama in a mite namsau pie a, tuale gamhluo pa tungah a lungthahna a gen hi.

⁶³Mei in a tangvalte katum a, tuale a numeite un mopawi-a sah ding la a nei sih uhi.

⁶⁴A siempute uh, namsau in puasah a, a meigong numeite un zong kaateng a lo sih uhi.

⁶⁵Tua ciengin kimutna panin TOPA khanglo a, galhang zukham pa bangin a awng vapo hi.

⁶⁶Ama in a galte a zo gawp hi; ama in a maizum zing dingin amate koi hi.

⁶⁷Ama in Joseph’ puonbuh nuol a, Ephraim minamte a teel sih hi.

⁶⁸Hizongle ama in a it Zion Muol, Judah minamte a teel hi.

⁶⁹Ama in a kip den dingin a phusa leitung bang le, a sang vantungte bangin a mun siengtho a lam hi.

⁷⁰Ama in a nasem David teel a, tuuhuongte panin ama a la hi.

⁷¹Ama’ mi Jacob, ama’ gouluo Israel-te tungah tuu banga a cing dingin ama in tuupi tasen neite a cinna panin ama a la hi.

⁷²Ama in thuman lungsim tawh amate a cing a, a khutsiemna tawh amate lam a pui hi.