Read Zou LAPITE 80 Bible Online

LAPITE 80 - Zou bible

LAPITE 80

¹La makaipa kunga “Thuciemna Unoh Kungte” awkai tawh sah ding Asaph’ laphuo khat. Tuuhonte banga Joseph a pui, Israel a cingpa aw, ngai in! Cherub-te tunga a to nang pa aw,

²Ephraim, Benjamin le Manasseh mai-ah hing tangkhie in. Na tha san inlen ei hun dingin hing pei in!

³Ka ngaingai uh ei bangsah kia in, Pasien aw; hutdam ka hi thei nadingun na mai hing tangsah in.

⁴Vanglien TOPA Pasien aw, na mite thungetna-ah nang bang tanvei lungthah ding na hei?

⁵Nangma in amate hlitui an tawh na vah zo a, amate dawn dingin hlitui a dimin na pie hi.

⁶Nangma in ka vengte’ simmaw[174] dingin kote nei bawl hi; ka galte un amahaw lahah kohaw nuizat nopna-in ei nei uhi.

⁷Ka ngaingai uh ei bangsah kia in, Vanglien Pasien aw; hutdam ka hi thei nadingun na mai hing tangsah in.

⁸Nangma in Egypt panin lenggui khat nang puo hi; nang in minamte na notdawh a, tua khu na suon hi.

⁹Nangma in tuami adingin leitang na paw sieng hi; tuami in zung thuh hing hla-in gam sung teng a dim hi.

¹⁰A hlim in muolte a khu a, a bazaute in zong taamtah singkung golte a khu hi;

¹¹tuipi lamah a bate zam a, a dawnngehte in Gunpi lam zuon hi.

¹²Tua ciengin lampi-a pei mi zosie in ama’ ga a law thei nadingin, bang dingin a daithawte na suhsietpieh ahei?

¹³Gamlahah a om ngal in tua khu a susie gawp a, gam sunga om ganhing zosie in kivana-in a nei uhi.

¹⁴Hing kilekia in, Vanglien Pasien aw; vantung panin ei ensuh inlen ei mu in; tami lenggui don in,

¹⁵tua khu nangma’ zietlam khut tawh na suonsa ahi hi.[175]

¹⁶Amate in mei tawh halin, a phuamat sieng uhi; nangma’ thangpai etna ziehin amate kisiesah in.

¹⁷Hinanle nang dinga na hatsah, na zietlam a om mipa tungah na khut ngam in.

¹⁸Tua hile na kung panin ka kiheikia nawn sih ding uhi; kote hinna ei pie in, tua hile nangma’ min kang hlan ding uhi.

¹⁹Vanglien TOPA Pasien aw, ka ngaingai uh ei bangsahkia in; hutdam ka hi thei nadingun na mai hing tangsah in.