Read Zou LAPITE 81 Bible Online

LAPITE 81 - Zou bible

LAPITE 81

¹La makaipa kunga Gittith[176] awkai-a sah ding Asaph’ laphuo khat. I thahatna ahi Pasien tungah nahpitahin la sa un; Jacob’ Pasien tungah lungdamin awng un.

²La sa-in tawm tum unlen, a ngaih lyre lasahna le harp tum un.

³Hla tha ni, hlalia ni, i pawi ni-in pengkul tum un.

⁴Azieh pen tami khu Israel adingin thukham ahi a, Jacob Pasien’ biehna ngaina a kip khat ahi hi.

⁵Egypt gam sunga[177] a pei lai-in ama in Joseph tungah thupiehna khat a bawl hi. Keima in ka thei ngai lo aw khat ka za hi:

⁶“Keima in a[178] liengko vua vangih ka zangsah hi; na[179] khutte un zong law a dom nawn sih hi.

⁷Na lungkham uh ciengin keima nei hlan vua, keima in note kang hunkhie hi; a kilang lo vanto sung panin note kang dawng hi; keima in Meribah tuite ah note kang zelah hi. Selah

⁸Ka mite aw, kang thuhil laitahin za un; Israel-te aw, keima’ thu ngai locin ci tei ing e!

⁹Note lahah pasien dang a om sih ding hi; gamdang pasien mai-ah na kun sih ding uhi.

¹⁰Kei pen Egypt gam panin note ang peipi to, na TOPA Pasien uh ka hi hi. Na kam uh golkah un, keima in kang dim ding hi.

¹¹“Hinanle ka mite in ka thugen a ngai sih uhi; keima tungah Israel-te ang kipha sih uhi.

¹²Tuaci’n a nop banga gamta dingin a lungkhauna sung vuah amate ka ap ta hi.

¹³Ka mite in ka thu ei ngai hinlen, Israel-te in ka lampi zui uleh izaw!

¹⁴Tuaci’n keima in a galte uh mallangin ka zawpi ding a, a galte uh’ langkhatah ka khuttum ka ziel ding hi.

¹⁵TOPA a mudate in ama mai-ah a thum ding vua, amau’ gimthuohna zong a kip peisuoh ding hi.

¹⁶Mangbu tuituoh pen tawh note[180] kang vah ding a, suongpi pana khuoizu tawh kang lungtaisah ding hi,” a ci hi.