Read Zou LAPITE 85 Bible Online

LAPITE 85 - Zou bible

LAPITE 85

¹La makaipa kunga Korah-te’ laphuo khat. TOPA aw, nangma in na gam maipha na pie hi; nangma in Jacob’ hamphatnate a ngaingai na bangsahkia hi.

²Na mite’ khielna na maisah a, a mawna zosie uh na ngaidam hi. Selah

³Na thangpaina zosie na lamang hi; na sinsona panin na kihei hi.

⁴Kote’ ki hutdamna Pasien aw, ka ngaingai uh ei bangsah kia inlen, ka tung vua na lungkim lona ei paimang pieh in.

⁵Ka tung vuah nang a lungthah den ding na mah? A khangkhangte zosie tungah lungthah peisuoh ding na mah?

⁶Na mite in nangma sungah nuom a sah thei nadingin, ei hingsahkia lo ding na mah?

⁷TOPA aw, ka tung vuah na itna kip ei lah inlen, na hutdamna ei pie in.

⁸TOPA Pasien’ thugen ding ei zasah un; azieh pen ama in a mite, a mi muonhuoite, le ama lama lungsim a kihei mite tungah kilemna thu a gen ding hi.[185]

⁹Ama’ minthanna i gam sungah a ten thei nadingin, ama a zatahte adingin ama’ hutdamna a nai om tahpi hi.

¹⁰Itna kip le citahna kimutuo ding hi; dihna le kilemna zong khatlekhat a kitawp ding uhi.

¹¹Leilah panin citahna ang po ding a, dihna in van panin a ensuh ding hi.

¹²TOPA in eite tungah sil hoite ei pie ding a, i leitang in zong an tampi a piengsah ding hi.

¹³A mai-ah dihna pei ding a, ama’ kalsuon nading lampi bawlpieh ding hi.