Read Zou LAPITE 91 Bible Online

LAPITE 91 - Zou bible

LAPITE 91

¹Sangpen Pa’[202] liena sungah tengin, Vanglienpa’ hlim a bel nangma in,

²TOPA kungah, “Ka kibuhna le ka kulpi; ka muon ka Pasien na hi hi,” na ci ding hi.

³Azieh pen ama in thangsie pa’ thang pan le a zauhuoi pul natna panin nang ang hunkhie ding hi;

⁴ama in a hlakuite tawh nangma ang hui ding a, ama’ hla nei-ah kibuhna na mu ding hi; ama’ muonhuoina khu lum le kawngga ahi hi.

⁵Zan lai-a zauhuoina hile, sun lai-a a leng thaltang hile,

⁶miel lahah a vahdap pul natna hile, suntang lai-a sietnate hile, na giing sih ding hi.

⁷Na gei-ah mi tulkhat pua-in, na ziet lamah mi tulsawm pua zong nan uleh tuate in nang ang neh kha sih ding hi.

⁸Na mit tawh na en lel beh ding a, migilote kithuhkiana na mu ding hi.

⁹Nangma in TOPA na kibuhna dingin bawlin,[203] Sangpen Pa na tenna mun dingin bawl zo na hi ziehin,

¹⁰nang tungah sietna ang tung sih ding a, na puonbuh gei-ah zong gimna ang tung sih ding hi.

¹¹Azieh pen ama in na lampi cin tengah nang ang cing dingin a vantung mite thu a pie ding hi.

¹²Na kengte in suong a suikhah lo nadingin, amate in a khut utawh nang ang dom ding uhi.

¹³Humpi le gulsum na tuon ding a, humpi khanglai le gulpi zong na tuoncil ding hi.

¹⁴Ei it mite ka hunkhie ding a; ka min a thei mite ka dal ding hi.

¹⁵Kei ei hlat ciengun amate ka dawng ding hi; keima in hahsat hun ciengin amate ka ompi ding a, amate hunkhie-in ka patawi ding hi.

¹⁶Keima in khansauna tawh amate ka lungkimsah ding a, tuale ka hutdamna amate ka lah ding hi.