Read Zou LAPITE 97 Bible Online

LAPITE 97 - Zou bible

LAPITE 97

¹TOPA kumpi ahi hi! Leitung lungdam heh; tuikul neu tampite zong kipah uheh!

²Meiipite le miel sapite in ama a kimvel uhi; ama’ kumpi topha bulpi pen dihna le thutang ahi hi.

³Ama mai-ah meikuong pei a, a kimvela om galte a katum hi.

⁴Ama’ tunphete in leitung tanvah hi; leitung in mu-in a kithing hi.

⁵TOPA mai, leitung mi zosie’ TOPA mai-ah khuoinun bangin muolte zungmang hi.

⁶Vantungte in ama’ thumanna a gen hi; mi zosie in ama’ minthanna a mu uhi.

⁷Kimanna a nei lo milimte a kisahtheipi, milimte a bie mi zosiete kimaizumsah ding hi; pasien zosiete zong ama mai-ah a kun uhi.

⁸Pasien aw, Zion in za-in nuom a, na thukhennate ziehin Judah khuopite[207] a lungdam uhi.

⁹Azieh pen TOPA aw, leitung zosie tungah nangma a sangpen na hi hi; pasien zosiete tung pehah nang ang kitawisang hi.

¹⁰TOPA in sietna a muda[208] mite a it hi; ama in mi muonhuoite’ hinna a kepcing pieh hi; ama in migilote khut sung panin amate hunkhie hi.

¹¹Midihte adingin khuo ang vah[209] a, lungsim mante adingin kipahna ang tung hi.

¹²No midihte aw, TOPA sungah lungdam unlen, ama’ min siengtho phat un!