Read Zou LAPITE 98 Bible Online

LAPITE 98 - Zou bible

LAPITE 98

¹Phatna Late khat. TOPA tungah la tha khat sa un, azieh pen ama in sil lamdangte a bawl zo hi. A zietlam khut le a ban siengtho in ama a guolzosah hi.

²TOPA in ama’ guolzawna a kitheisah zo ta hi; ama in minamte muna-ah a thumanna lah zo hi.

³Ama in Israel innkuonte tungah a itna kip le a muonhuoina a phawhkia zo hi. Leimongte zosie in i Pasien’ guolzawna mu sieng zo uhi.

⁴Leitung mi zosie aw, TOPA tungah lungdamna aw gingsah un; lungdamin awngin phatna la sa un.

⁵Lyre lasahna tawh phatna la sa unlen, lyre tumin aw ngaih tawh phat un.

⁶Pengkulte le saki aw tawh TOPA, Kumpipa’ mai-ah lungdamna aw gingsah un.

⁷Tuipi le a sunga om zosie le leitung le a tunga teng zosie awng uheh.

⁸Tuikhangte in khut beng uheh; TOPA’ opna munah muoltangte in lungdamin la sa ton uheh. Azieh pen leitung thukhen dingin ama ang pei ta hi. Ama in dihna tawh leitung thu khen ding a, guptuom paituom nei loin mite thu a khen ding hi.