Read Zou PAUNAH 1 Bible Online

PAUNAH 1 - Zou bible

PAUNAH 1

¹Israel kumpi, David’ tapa Solomon Paunahte:

²Azieh pen mite in pilna le kithuhilna-te a sin thei nading, a khietna thuh a nei kammalte a theitel nading,

³pilvang tahin gamta a, thuman le thutang tawh a kilawm a kituoha a gamtat thei nading;

⁴mimawte tungah pilvanna thute hilin, khangnote tungah theina le thu khinkhai theina hil nading,

⁵mipilte in zong tami thu za-in a theina uh belap hinlen, thu ngaisut siemna a nga thei nading,

⁶Paunahte, le gentenate, mipilte’ thugente le a telha kamthuhte a theitel nading ahi hi.

⁷TOPA zatahna in theina kipatna ahi hi; mimawte in pilna le kithuhilna a thusim sih uhi.

⁸Ka ta aw, na pa ang thuhilna za inlen, na nu ang thumopte niel sin;

⁹azieh pen tuate khu na lutunga paakuol kilawm le na ngawnga na awh khiba tawh kibang ahi hi.

¹⁰Ka ta aw, mawneite in ang zawl uleh, nuom malmal sin.

¹¹Amate in, “Ko ei zui inlen, sisan luon nading va sui ta vai; huoiham tahin maw nei lo om muong khat va buh ta vai;

¹²Hankhuh-a peisuhte bang le Misikhuo bangin cidamin a hinglai pi ma-un amate va valtum ta vai.

¹³Na manpha namkim i mu ding vua, i vanlahte utawh i inn i dim ding uhi.

¹⁴Kote ei pawl inlen, i unpi-un i sum i paite kitan ciet vai,” ang ci uleh,

¹⁵ka ta aw, a lampi vuah amate tawh zawhton sinlen, a lampi panun kihemkhie in;

¹⁶azieh pen amate in sietna lamah a kal uh a nawsuon mama vua, sisan suo nading thu ah a kinaw mama uhi.

¹⁷Va in ei et laitahin a siena lenthang i zah pan pen a mawkna ahi hi;

¹⁸hinanle tua pen a si ding uh ngah a, bawh khinkhian uh hi lel hi! tuale a hinna uh a bei nadinga zong, amahaw kibuhdap ahi lel uhi!

¹⁹Huoihamna tawh a nga sawm zosiete’ lam tawpna[1] pen tam bang ahi hi; tua banga a nga mite in a hinna utawh a lo uhi.

²⁰Gawldung tengah pilna kiko-in, khuolai tuol-awng tengah aw ngai tahin kiko hi.

²¹Mihon kikhopna-ah ama kiko hi; ama in khuopi lutna tunkotte ah thu a gen hi:

²²“No mimawte aw, bang tanvei mawlawm lai ding na hi uh ahei? Misimmawte in zong bang tanvei simmaw na lai-in, mimawte in theina bang tanvei huo lai ding na hi uh ahei?

²³Kang phawsietna thupise un; note tungah ka ngaisutnate kang sung ding hi; ka thute kang theisah ding hi.

²⁴Azieh pen ke’n kang hlat vangun note in nei niel vua, ka khut kang zapzap vangun koima’n nei thudon sih uhi.

²⁵Kang thumopte zosie thusim loin, kang phawna khat beh na zui lo ziehun,

²⁶ke’n zong na tuosietna uh kang nuisan zieu lel ding hi; zauhuoina in ang nawh uh ciengin kang simmawbawl lel ding hi.

²⁷Zauhuoina in huipi bangin hing nawh gawpin, na tung vuah pumpei bangin vangsietna hing tung a, na tung vuah lungkhamna le khuisahna ang tun ciengin zong, kang thudon sih ding hi.

²⁸Tua ciengin amate in keima ei hlan ding vua, ahi vangin keima in ka dawng sih ding hi; amate in kintahin ei sui ding vua, ahi vangin ei mu sih ding uhi.

²⁹Azieh pen amate in theina muda-in, TOPA zatah ding a teel sih vua,

³⁰ka thumopte khat zong zui loin, ka phawna zosie a thusim sih vua,

³¹tua ziehin amate in a gamtatna ga a ne ding vua, amau’ gelnate ma in amate a gimsah ding hi.

³²Azieh pen mimawlte in amau’ mottatna a silaw vua, mimawte in amau’ thudon lona a sietlaw uhi;

³³hinanle ka thugen a ngai mite a lung uh muong ding a, a siehuoi tuosietna nei loin nuomtahin om hit hiet ding uhi.