Read Zou PAUNAH 10 Bible Online

PAUNAH 10 - Zou bible

PAUNAH 10

¹Solomon’ paunahte. Tapa pil in a pa lungdamsah a, tapa maw in a nu dasah hi.

²Gitlona tawh a kinga goute in phattuomna a nei sih a, sina panin dihna in ei hunkhie hi.

³TOPA in thuman mite a gilkielin a koi sih a, ama in migilote a du uh a ngawlsah hi.

⁴A thasie khut in mi zawngsah a, a thanuom khut in mi hausah hi.

⁵Khal lai-a an khol pa pen tapa pilvang ahi a, anlah huna a kimu tapa in maizumna piengsah hi.

⁶Midihte’ lutungah thupha om a, migilote’ kam in kheltatna selcip hi.

⁷Midihte kiphawna pen thupha ahi a, migilote’ min muotmang ding hi.

⁸Mipilte’ lungtang in thupiehte thudon ding a, a mot ham mimaw pa in sietna a tut ding hi.

⁹Citahna lampi a zui poma lungnuomin kalsuon ding a, gitlona lampi a zui poma kiphawhkhie veve ding hi.

¹⁰A mit-hem tawh mi a en poma in buoina piengsah a, hangsantaha mi a phawsieh pa in kilemna piengsah hi.[30]

¹¹Midihte’ kamham in hinna tuinah ahi a, migilote’ kamham in tatsietna a selcip hi.

¹²Mudana in kihauna piengsah a, itna in khielna teng khucip hi.

¹³Thutelna nei pa’ kam sungah pilna kimu a, pilna a nei lote’ elzang ah ciengpum a om hi.

¹⁴Mipilte in theina a khol vua, mimawte’ mot hamna in sietna tungsah bai hi.

¹⁵Mihaute’ hauna in amau’ kulpi ahi hi; mizawngte’ zawnna in amau’ kisietna ahi hi.

¹⁶Thumante’ thaman in hinna lamah pui a, migilote’ nga phattuomna in mawna lamah a pui hi.

¹⁷Kithuhilna a thudon poma hinna lampi tunga om ahi a, phawsietna a nuol poma a lam pielmang ahi hi.

¹⁸Zuou kam in mudana selcip a, mi gensie poma mimaw ahi hi.

¹⁹Thu a kitam gen ciengin khielna zong a om pai a, mi pilvangte ham a ki-ip uhi.

²⁰Midihte leii in nguntang hoipen ahi a, migilote’ lungsim bangma a man sih hi.

²¹Midihte’ nephu in mi tampi vah a, mimawte in a motna a sipi uhi.

²²TOPA’ thupha in hauna piengsah a, ama in tua tawh dana kici a belap sih hi.[31]

²³Khielna bawl ding pen mimawte adingin apmaina bang lel a, theitelna a nei mi in pil gamtat nuom a sa hi.

²⁴Migilote tungah amau’ giinpen tung ding a, thuman mite ahi uleh a dei bang uh kipie ding hi.

²⁵Huipi in a nawh ciengin migilote a om nawn sih vua, midihte ahi uleh kumtawnin kip ding uhi.

²⁶Lengga tuithua in ha zasah a, meikhu in mit a sipsah bangin, mi thadate in nasep a ciel a pute gentheisah uhi.

²⁷TOPA zatahna in khan sausah a, migilote’ khankum a tom ding hi.

²⁸Midihte’ kinepna khu lungdamna-ah a tawp a, migilote’ kinepna bangma lo a suoh hi.

²⁹Mi thumante adingin TOPA’ lampi in munkip muonhuoi ahi a, sietna a bawl mite adingin kisuhsietna ahi hi.

³⁰Midihte a opna panun kisuonkhie lo ding a, migilote ahi uleh gam sungah a omsuoh sih ding uhi.

³¹Midihte’ kam panin pilna pusuoh a, thusie a gen leii ki-atsan ding hi.

³²Midihte’ nephu kam in mite’ san thei ding thu thei a, migilote kam ahile thusie vive ahi hi.